ԵՐԵՎԱՆ, 25 մայիսի - Sputnik. Ազգային ժողովում թեժ քննարկում է ընթանում «Սահմանամերձ համայնքների սոցիալական աջակցության մասին օրենքում լրացում կատարելու» նախագծի առնչությամբ։
Հայտնել էինք, որ ԱԺ–ն օրակարգ չընդունեց նախագիծը, որով առաջարկում էին` պետությունը 100 տոկոսով գնի սահմանամերձ համայնքների բնակիչների բերքը։
Իմքայլական պատգամավոր Գևորգ Պապոյանը նշեց, որ Հայաստանում կան օլիգարխ հողատերեր, որոնք ՀՀ տարածքներում, այդ թվում սահմանամերձ համայնքներում հարյուրավոր հեկտարներով հողեր ունեն։
«Հիմա այս նախագիծն են բերում, որ հետո ինչ–որ բան արտադրեն սահմանամերձ գյուղերում, մնացած հարյուրավոր հեկտարներն էլ մտցնեն դրա տակ և ՀՀ քաղաքացիներն իրենց գրպաններից վճարեն, որ այս բերքը գնեն։ Նախագիծը չի վերաբերվում սահմանամերձի բնակիչներին, այլ նրանց թալանելուն է ուղղված»,–ասաց Պապոյանը։
Սահմանամերձ դարձած համայնքներից յուրաքանչյուրը կստանա շուրջ 10 մլն դրամ սուբսիդիա
ԱԺ անկախ պատգամավոր Սոֆյա Հովսեփյանն էլ ի պատասխան նշեց, որ երբ Պապոյանն ասում է, թե օրենքը բերում են, որ հետո գնան օլիգարխիկ տնտեսությամբ զբաղվեն, պետք է լավ մտածի, թե ում մասին է խոսում։
«Երբևէ ձեզ թույլ չտաք ինձ նմանատիպ գործընթացների մեջ ներառել։ Երբ պատերազմի օրերին սահմանամերձ գյուղերում սելֆի եք անում, չի նշանակում, որ այդ գյուղերի տեղը գիտեք»,–ասաց նա։
Հովսեփյանի խոսքով` ինքն արդեն 7 տարի է, ինչ ամեն ամիս լինում է սահմանամերձ գյուղերում։
Նշենք, որ օրենքը հեղինակել են անկախ պատգամավորներ Թագուհի Թովմասյանը, Սոֆյա Հովսեփյանը և Աննա Գրիգորյանը:
«Մենք էլ ենք զարմացել». նախկինում սահմանամերձ Շինուհայրն այժմ չկա որևէ ցանկում. ինչո՞ւ
