ԵՐԵՎԱՆ, 24 մայիսի - Sputnik. Հայտնի դերասան Արմեն Ջիգարխանյանի գերեզմանին պատրաստվում են տապանաքար տեղադրել։ Այս մասին հայտնել է նրա ընկեր Արթուր Սողոմոնյանը ՝ մեկնաբանելով համացանցում և մամուլում հայտնված լուսանկարները, որոնք արվել են արտիստի հուղարկավորման վայրում։
Ավելի վաղ ԶԼՄ-ներում հայտնվել էին լուսանկարներ, որոնցում երևում էր, որ ծաղկեպսակներով և ցանկապատով տարածքի փոխարեն` պարզապես հարթ վայր է՝ խաչով և Ջիգարխանյանի փոքրիկ դիմանկարով:
«Կոմսոմոլսկայա պրավդա» թերթին տված հարցազրույցում Սողոմոնյանը պատմել է, որ հարթեցրել են արտիստի շիրիմն ամփոփող հողաթումբը և այդ պահին ինչ-որ մեկը լուսանկարել է գերեզմանը։Դերասանի ընկերը վրդովված է տեղի ունեցածից, նա զայրացած է, որ Ջիգարխանյանին անգամ մահից հետո հանգիստ չեն թողնում։
«Նույնիսկ չեմ ուզում մեկնաբանել այդ պատմությունը։ Ընդամենը պատրաստում ենք տապանաքարի տեղադրման վայրը։ Քանդակագործների մրցույթ է հայտարարվել, արդեն իսկ մի քանի առաջարկներ։ Ցանկանում ենք մինչև նոյեմբերի 14-ը` Ջիգարխանյանի մահվան տարելիցի օրը, ինչպես ընդունված է հայկական ավանդույթում, տապանաքար տեղադրել։ Թե ինչ նյութից և ինչ տեսք կունենա այն, դեռ վաղ է խոսել»,–ասել է Սողոմոնյանը։
Նա նաև պարզաբանել է, որ քանդակագործները հարթեցրել են հողաթումբը, որպեսզի տապանաքարը հետո «չնստի»։ Այդ ամենի մասին, ըստ Սողոմոնյանի, տեղյակ է Ջիգարխանյանի միակ ժառանգը՝ որդին` Ստեփանը։
Ի դեպ, Ջիգարխանյանի ընկերներն ու ընտանիքը որոշել են, որ շիրիմի շուրջ պարիսպներ չեն լինելու։ Սողոմոնյանն այդ կապակցությամբ էլ նշել է, որ շատ հայտնիների գերեզմաններում պարիսպներ չկան, որպեսզի երկրպագուները ազատ ելումուտ ունենան և ծաղիկներ խոնարհեն։
«Եթե կյանքը գերեզմանում է վերջանում, ուրեմն դա սուտ բան է, մեզ խաբեցին». Ջիգարխանյան
Հիշեցնենք, որ 85–ամյա Ջիգարխանյանը մահացավ նախորդ տարվա նոյեմբերի 14-ին։ Մոսկվայի դրամատիկական թատրոնի հիմնադիրը 26 տարի շարունակ ղեկավարեց այն։
