ԵՐԵՎԱՆ, 24 մայիսի - Sputnik. Իրանական կողմը հետաքրքրված է «Հյուսիս-հարավ» ճանապարհի հարավային հատվածների կառուցման աշխատանքներին ներգրավվելու հարցով։ Իրանի ճանապարհաշինության և քաղաքաշինության նախարար Մոհամմադ Էսլամին է հայտնել այդ մասին` ՏԿԵ նախարարի պաշտոնակատար Սուրեն Պապիկյանի հետ հանդիպման ժամանակ։ Տեղեկությունը հայտնում են ՏԿԵ նախարարությունից։
«Էսլամին վերահաստատել է իրանական կողմի պատրաստակամությունը տնտեսական կապերի խորացմանը նպաստող փոխշահավետ նախաձեռնությունների, մասնավորապես՝ «Պարսից ծոց – Սև ծով» միջազգային տրանսպորտային միջանցքի նախագծի կյանքի կոչման գործում։ էսլամին խոսել է Հայաստանի հետ ավտոմոբիլային և երկաթուղային հաղորդակցությունն ընդլայնելու մասին»,-նշված է հաղորդագրության մեջ։
Պապիկյանը զրուցակցին մանրամասներ է հաղորդել «Հյուսիս-հարավ» ճանապարհի Սիսիան-Քաջարան և Քաջարան-Ագարակ ճանապարհահատվածի նախագծման և շինարարության մեկնարկի վերաբերյալ։ Նախարարը հայտնել է, որ պետական միջոցների ներգրավումը ծրագրում լավ նախադրյալներ կստեղծի արտասահմանյան, այդ թվում՝ իրանական շինարարական ընկերությունների ներկայացվածության համար։
Իրանական կողմին փոխանցվել է, որ ՏԿԵ նախարարությունը օրենսդրական փոփոխությունների փաթեթ է նախաձեռնել, որով նախատեսվում է վերանայել Հայաստանի տարածքով իրանական տարանցիկ բեռնափոխադրումների համար գանձվող վճարների դրույքաչափերը։ Դրանց հաշվարկման չափանիշները փոփոխության արդյունքում իրանական բեռնափոխադրողների համար այդ դրույքաչափերը մի քանի անգամ կնվազեն։
Հիշեցնենք, որ Էսլամին Հայաստանում կլինի մինչև մայիսի 25-ը։
Ավելի վաղ հայտնի էր դարձել, որ մոտ օրերս Հայաստան կայցելի Իրանի արտաքին գործերի նախարար Մոհամմադ Ջավադ Զարիֆը:
Արա Այվազյանն ընդունել է Իրանի դեսպանին. խոսել են ադրբեջանցիների ներթափանցման մասին
