ԵՐԵՎԱՆ, 21 մայիսի - Sputnik. Ճանաչված բռնցքամարտիկ Արթուր Աբրահամը չի ցանկանում ոչ մի կտոր հող զիջել թշնամուն։ Նա իր ցանկության մասին խոսեց այսօր լրագրողների հետ զրույցում` անդրադառնալով հայ–ադրբեջանական սահմանին տիրող իրադրությանը։
«Իմ ցանկությունն այն է, որ ինչը մերն է, մերը մնա, մենք ուրիշինը չենք ուզում, մերը թող մնա մեզ, ուրիշինը՝ ուրիշին։ Մենք մեր հողից ոչ մեկին ոչ մի կտոր չպետք է տանք»,– ասաց նա։
Բռնցքամարտիկը հրաժարվեց պատասխանել քաղաքական հարցերին` նշելով, որ ինքը քաղաքական գործիչ չէ։
Արթուր Աբրահամի խոսքով`միակ ելքը համախմբված, ուժեղ լինելն է, որ կարողանանք հաղթել։
«Մենք ամբողջ կյանքում բոլոր կողմերից նեղված ենք եղել, մեր մեջքն ուժեղ պետք է լինի, միակ միջոց դա է»,-ասաց նա և ավելացրեց` պատերազմի ընթացքում ողջ հայ ժողովուրդը համախմբվել էր, ինքը դա տեսել է ու զգացել այդ ուժը, որը հիմա մեզ պակասում է։
Հիշեցնենք` մայիսի 12-ի առավոտյան ադրբեջանական զինուժը «սահմանների ճշգրտման» հիմնավորմամբ փորձել է որոշակի աշխատանքներ իրականացնել Սյունիքի սահմանային հատվածներից մեկում, սակայն հայկական ստորաբաժանումների ձեռնարկած միջոցառումներից հետո ադրբեջանական զինվորականները դադարեցրել են այդ աշխատանքները։
Նույն օրը ՀՀ վարչապետի պաշտոնակատար Նիկոլ Փաշինյանն անվտանգության խորհրդի նիստում հայտարարեց, որ սա Ադրբեջանի կողմից դիվերսիայի փորձ է, և որ խնդիրը պետք է կարգավորվի բանակցությունների միջոցով։
ՊՆ–ն մայիսի 13-ին հայտնեց, որ Ադրբեջանը հերթական սադրանքն է իրականացրել Վարդենիսի և Սիսիանի սահմանային հատվածներում։
Մայիսի 14–ին Փաշինյանը հայտարարեց, որ կեսօրին պաշտոնապես դիմել են ՀԱՊԿ և ռազմական աջակցության հարցով դիմել ՌԴ նախագահ Վլադիմիր Պուտինին։
Մայիսի 13-ից ադրբեջանցիների հետ բանակցություններ են անցկացվում։
