ԵՐԵՎԱՆ, 20 մայիսի – Sputnik. «5165» ազգային կազմակերպության անդամներն ու աջակիցները փակել են Բաղրամյան պողոտան ու Դեմիրճյանը փողոցը, որպեսզի արգելեն ՀՀ վարչապետի պաշտոնակատար Նիկոլ Փաշինյանի ու պատգամավորների ճանապարհը և ստանան իրենց հուզող հարցերի պատասխանը։
Ինչպես հայտնում է Sputnik Արմենիայի թղթակիցը, Ազգային ժողովի դարպասները փակ են ու ակցիայի մասնակիցները չեն կարող մտնել շենքի բակ։
«Կառավարությունում չէ այն մարդը, որ հանձնում է Հայաստանը։ Նա Ազգային ժողովում է, եկեք այստեղ։ Մենք հավաքվելու ենք ամեն օր։ Մենք դառնալու ենք հեղեղ, պայքարելու ենք այնքան, մինչև Հայաստանը մաքրվի ներքին դավաճանից», - նշեց շարժման ղեկավար Կարին Տոնոյանը։
Փաստաբանների պալատի ղեկավար Արա Զոհրաբյանն էլ հայտնեց, որ կազմավորվում է Հայաստանի պաշտպանության կոմիտե, որում ներգրավվելու են կամավորները և կամավորական ջոկատների հրամանատարները։ Կոմիտեի նպատակն է հասկանալ, թե երկիրը պաշտպանող որքան մարդ կա։
Նշենք, որ այսօր` ժամը 17։00-ին, Երևանի Հանրապետության հրապարակում` ՀՀ կառավարության շենքի մոտ, հանրահավաք մեկնարկեց։
Պատճառը աղմուկ հանած փաստաթուղթն է, որը ՀՀ վարչապետի պաշտոնակատար Նիկոլ Փաշինյանը պատրաստվում է ստորագրել ադրբեջանական և ռուսական կողմերի հետ։
Հանրահավաքի կազմակերպիչները պաշտպանության նախարարությունից և գլխավոր շտաբից պահանջում էին կատարել երկրի պաշտպանության սահմանադրական պարտականությունները` ամրապնդել դիրքերը Սյունիքի և Գեղարքունիքի ուղղություններով, ինչպես նաև դադարեցնել ապատեղեկատվություն տարածելն ու հանրությանը ասել բացառապես ճշմարտությունը։
Ակցիային մասնակցում են հասարակական ու քաղաքական կազմակերպությունների ներկայացուցիչներ, մշակութային գործիչներ:
Ցուցարարները հայտարարեցին, որ եկել է բեկումնային պահը և անհրաժեշտ է անցնել վճռական գործողությունների։ Նրանք քայլերթով հասան ԱԺ, որտեղ արտահերթ նիստ է կազմակերպվել։
Հիշեցնենք` Միքայել Մինասյանը մայիսի 19–ին Facebook–ում գրել էր, որ ավարտվել է Հայաստանի և Ադրբեջանի միջև կնքվելիք նոր հայտարարության փաստաթղթի ձևակերպման աշխատանքը։
Նրա խոսքով` այդ փաստաթղթում դիվանագիտորեն, գեղեցիկ ձևակերպումներով, ըստ էության, ձևակերպվում է նոր դեմարկացիան՝ Հայաստանի համար աղետալի հետևանքներով։
ՊՆ-ն կոչ է անում ձեռնպահ մնալ Սյունիքի և Գեղարքունիքի սահմանային հատվածներ այցելելուց
Ըստ Մինասյանի` դեմարկացիան հիմնված է լինելու երեք սկզբունքի հիման վրա՝ ԽՍՀՄ քարտեզների, աշխարհագրական նպատակահարմարության և այդ պահին եղած իրական պատկերի։ Սրա հետևանքով, ըստ նրա, Նիկոլ Փաշինյանը քննարկման առարկա է դարձրել Տավուշի մարզի 5 գյուղերը և Արարատի մարզի մեկ գյուղն Ադրբեջանին հանձնելը։
Իսկ այսօր կառավարության նիստում Փաշինյանը հայտարարեց, որ պատրաստվում է ստորագրել այդ փաստաթուղթը։
