ԵՐԵՎԱՆ, 20 մայիսի - Sputnik. Մենք պետք է պարտադրենք այս իշխանությանը, որ գաղտնի փաստաթղթեր չստորագրի։ Կառավարության դիմաց անցկացվող բողոքի ակցիայի ժամանակ հայտարարեց Փաստաբանների պալատի նախագահ Արա Զոհրաբյանը` ներկայացնելով բողոքի ակցիայի մասնակիցների պահանջները։
«Հասկանում ենք, որ տեղի են ունենում բանակցություններ, և պատերազմից խուսափելու համար իշխանությունը փորձում է խաղաղ ճանապարհ գտնել, բայց դա չի կարող մեզ միակողմանի զիջումների և ստրկության տանել, որովհետև եթե հիմա զիջեցինք, Ալիևը հաջորդ պահանջն է դնելու, չմոռանանք Ալիևի խոսքերը` Գեղարքունիք, Զանգեզուր, Երևան»,- ասաց նա։
Զոհրաբյանին վրդովեցրել է Սյունիքում տեղի ունեցած միջադեպի շուրջ իշխանություն վերաբերմունքը. նախ` փորձեցին ծածկադմփոց անել, ապա գլուխ գովել, որ մեր զինվորները բախման մեջ չեն մտել։
«Զինվորը նրա համար է, որ բախման մեջ մտնելով մեզ պաշտպանի, ինչպես ոստիկանները։ Լավ, մինչև ո՞ր կետն ենք մենք պատրաստ բախման մեջ չմտնել։ 3-6 կմ առաջացան, հետո էլի են առաջանալու, այդ ժամանակ ի՞նչ ենք անելու, էլի՞ բախման մեջ չենք մտնելու, մինչև ո՞ւր ենք նահանջելու»,- նշեց նա։
Փաստաբանների պալատի նախագահի խոսքով` հանրահավաքի մասնակիցները ՀՀ ՊՆ-ից և ԶՈւ ԳՇ-ից պահանջում են նաև կատարել իրենց սահմանադրական պարտականությունը` պաշտպանել երկիրը։
Չպետք է հեռանանք այնքան ժամանակ, քանի դեռ մեր երկրից չեն հեռացել դավաճանները. Տոնոյան
Անդրադառնալով համացանցում հայտնված աղմկահարույց տեսանյութին` Զոհրաբյանը նկատեց. «Ցանկացած երկրում նման տեսանյութից հետո պաշտպանության նախարարն ու ԶՈւ գլխավոր շտաբի պետը հրաժարական կտային, մեզ մոտ չեն տվել»։
Երրորդ կետով, ըստ Զոհրաբյանի, կառավարության դիմաց հավաքված քաղաքացիները պահանջում են, որ բոլոր պաշտոնատար անձինք ժողովրդի հետ անկեղծ խոսեն և հրաժարվեն ստահոդ լուրեր տարածելուց, հակառակ դեպքում հասարակությունը ստիպված կլինի մերժել նրանց։
Հիշեցնենք, որ Միքայել Մինասյանը մայիսի 19–ին Facebook–ում գրել էր, որ ավարտվել է Հայաստանի և Ադրբեջանի միջև կնքվելիք նոր հայտարարության փաստաթղթի ձևակերպման աշխատանքը։
«Ահա փաստաթուղթը, որի մասին գրել էի». Միքայել Մինասյանը լուսանկար է հրապարակել
Նրա խոսքով` այդ փաստաթղթում դիվանագիտորեն, գեղեցիկ ձևակերպումներով, ըստ էության, ձևակերպվում է նոր դեմարկացիան՝ Հայաստանի համար աղետալի հետևանքներով։
Ըստ Մինասյանի` դեմարկացիան հիմնված է լինելու երեք սկզբունքի հիման վրա՝ ԽՍՀՄ քարտեզների, աշխարհագրական նպատակահարմարության և այդ պահին եղած իրական պատկերի։ Սրա հետևանքով, ըստ նրա, Նիկոլ Փաշինյանը քննարկման առարկա է դարձրել Տավուշի մարզի 5 գյուղերը և Արարատի մարզի մեկ գյուղն Ադրբեջանին հանձնելը։
Իսկ այսօր կառավարության նիստում ՀՀ վարչապետի պաշտոնակատար Նիկոլ Փաշինյանը հայտարարեց, որ պատրաստվում է ստորագրել այդ փաստաթուղթը։
