ԵՐԵՎԱՆ, 19 մայիսի- Sputnik. Սյունիքի մարզպետ Մելիքսեթ Պողոսյանը վստահեցնում է` այս պահին իրավիճակը շփման գծում հանգիստ է։ Պողոսյանը Sputnik Արմենիայի հետ զրույցում տեղեկացրեց այդ մասին։
«Այս պահին խաղաղ է։ Ադրբեջանցիները եկել են, անցել պաշտպանության և այդպես մնացել են։ Մերոնք կանգնած են այնտեղ, ուր կանգնած էին, նրանք էլ իրենց տեղում են։ Առաջին օրվանից էլ հանգիստ է եղել վիճակը, մնաց` վերջը լինի հանգիստ։ Ադրբեջանցիները նույն տեղում են, առաջ չեն եկել»,–ասաց Պողոսյանը։
Հարցին, թե ինչպե՞ս են սնունդ հասցնում ադրբեջանցի զինվորներին` Պողոսյանը պատասխանեց կարճ` կան տեղեր, որ սնվում են։
Սյունիքի մարզպետը նշեց, որ տեղյակ չէ առաջիկայում ադրբեջանցի զինվորների վերադարձի առնչությամբ բանակցություններ կլինե՞ն, թե ոչ։
Անդրադառնալով հարցին, թե տեղում հովիվներն անասնապահությամբ կարողանո՞ւմ են զբաղվել, թե ոչ` Պողոսյանը նշեց, որ, այո, ուղղակի Սև լճի ներքևի հատվածում են։ «Մեր հովիվները մեր սահմանում են հիմա արածեցնում անասուններին, իսկ այնտեղ, ուր ադրբեջանցիներն են, դեռ ձյուն է, չեն կարող գնալ»,–ասաց Պողոսյանը։
Նշենք, որ ՀՀ պաշտպանության նախարարությունը հայտնել էր, որ ադրբեջանական կողմն այսօր նախանշված բանակցություններին չի ներկայացել։
Հիշեցնենք` մայիսի 12-ի առավոտյան ադրբեջանական զինուժը «սահմանների ճշգրտման» հիմնավորմամբ փորձել է որոշակի աշխատանքներ իրականացնել Սյունիքի սահմանային հատվածներից մեկում, սակայն հայկական ստորաբաժանումների ձեռնարկած միջոցառումներից հետո ադրբեջանական զինվորականները դադարեցրել են այդ աշխատանքները։
Ինչո՞ւ են Հայաստանի սահմանային հարցերը քննարկում ՀԱՊԿ-ը և Ադրբեջանը
Նույն օրը ՀՀ վարչապետի պաշտոնակատար Նիկոլ Փաշինյանն անվտանգության խորհրդի նիստում հայտարարեց, որ սա Ադրբեջանի կողմից դիվերսիայի փորձ է, և որ խնդիրը պետք է կարգավորվի բանակցությունների միջոցով։
ՊՆ–ն մայիսի 13-ին հայտնեց, որ Ադրբեջանը հերթական սադրանքն է իրականացրել Վարդենիսի և Սիսիանի սահմանային հատվածներում։
Մայիսի 14–ին Փաշինյանը հայտարարեց, որ կեսօրին պաշտոնապես դիմել են ՀԱՊԿ և ռազմական աջակցության հարցով դիմել ՌԴ նախագահ Վլադիմիր Պուտինին։
Մայիսի 13-ից ադրբեջանցիների հետ բանակցություններ են անցկացվում։
