ԵՐԵՎԱՆ, 18 մայիսի - Sputnik. Երուսաղեմում մի խումբ հրեա ծայրահեղական երիտասարդներ հարձակվել են Երուսաղեմի Հայոց պատրիարքության Սուրբ Հակոբյանց միաբանության անդամ Հոգեշնորհ Տեր Արբակ Աբեղա Սարուխանյանի վրա։ Հայտնում է ՀՀ վարչապետի աշխատակազմի «Հանրային կապերի և տեղեկատվության կենտրոնի» Սփյուռքի բաժնի hayernaysor.am կայքը։
Հարձակումը եղել է Սուրբ Հարության տաճարի ճանապարհին։ Հայր Արբակը ստացել է մարմնական վնասվածք և անմիջապես տեղափոխվել է հիվանդանոց։
«Հրեա ծայրահեղականների կողմից նման հարձակումների հաճախ են ենթարկվում Պատրիարքարանի անդամները։ Հարձակվողները 7-ն են եղել, 3 հիմնական մասնակիցները ձերբակալվել են արդեն։ Իսկ Հայր Արբակը հիվանդանոցում համապատասխան բուժում ստանալուց հետո դուրս է գրվել»,– «Հայերն այսօրին» ասել է Երուսաղեմի Հայոց Պատրիարքության դիվանապետ Տեր Կորյուն Վարդապետ Բաղդասարյանը։
Պատրիարքությունը պաշտոնապես բողոք է ներկայացրել ոստիկանությանը՝ պահանջելով արդար քննություն կատարել, որպեսզի հանցագործները պատժվեն օրենքով՝ հետագայում նման դեպքերից խուսափելու համար։
«Այսպիսի հարձակման դեպքեր, որի արդյունքում մարմնական վնասվածք հասցվի, շատ քիչ են եղել։ Սա երկրորդ այսպիսի դեպքն է», - ասել է Հայր Կորյունը։
«Բայրաքթարները» Երուսաղեմում օդ կբարձրանա՞ն, կամ ինչ նպատակ է հետապնդում Նեթանյահուն
Ըստ նրա՝ նախկինում այսպիսի դեպքերի առնչությամբ դատական գործեր են բացվել, և այս տարի առաջին անգամ դատարանը տուգանել է հարձակվողներից մեկին՝ տուժող կողմին տրամադրելով դրամական փոխհատուցում։
