ԵՐԵՎԱՆ, 13 մայիսի- Sputnik. Ադրբեջանցի զինծառայողները շարունակում են մնալ ՀՀ պետական սահմանից ներս, դեռ չի հաջողվել նրանց հետ մղել։ Հանրային հեռուստաընկերության հետ զրույցում նման հայտարարություն է արել ՀՀ անվտանգության խորհրդի քարտուղար Արմեն Գրիգորյանը:
«Սյունիքի մարզի Ներքին Խնձորեսկ համայնքի մոտակայքում բանակցությունները շարունակվում են»,– ասել է նա:
ՀՀ Սյունիքի մարզի Վերիշենի գյուղապետ Արարատ Օրդյանն էլ Sputnik Արմենիայի թղթակցի հետ զրույցում հայտնեց, որ ադրբեջանցիները շարունակում են մնալ զբաղեցրած դիրքերում։
«Այսօր ադրբեջանցիները ՀՀ պետական սահմանից ներս են, տեղ կա` մեկ, տեղ կա` երկու–երեք կմ»,–ասաց նա։
Նա ընդգծեց, որ բանակցությունները դեռ շարունակվում են, այս պահի դրությամբ դրանք արդյունք չեն տվել։
Հիշեցնենք` մայիսի 12–ին լրատվամիջոցներում ու սոցկայքերում լուրեր էին տարածվել, թե Սյունիքի մարզի Իշխանասար գյուղի հատվածում թշնամին մարտական գործողություններ է սկսել։
Գորիսի փոխհամայնքապետ Իրինա Յոլյանը Facebook-ում գրել էր, որ թշնամին Իշխանասարի հատվածում պետական սահմանն անցել է և ևս երեք կիլոմետր առաջ եկել դեպի Վերիշեն բնակավայր։
ՀՀ ՊՆ մամուլի ծառայությունն էլ հայտնել էր, որ մայիսի 12-ի առավոտյան ադրբեջանական զինուժը, «սահմանների ճշգրտման» հիմնավորմամբ, փորձել է որոշակի աշխատանքներ իրականացնել Սյունիքի սահմանային հատվածներից մեկում, սակայն հայկական ստորաբաժանումների ձեռնարկած միջոցառումներից հետո ադրբեջանական զինվորականները դադարեցրել են այդ աշխատանքները։
Ուշ երեկոյան ՀՀ վարչապետի պաշտոնակատար Նիկոլ Փաշինյանի գլխավորությամբ Անվտանգության խորհրդի նիստ տեղի ունեցավ այս թեմայի շուրջ, որի ընթացքում Փաշինյանը փաստեց, որ սա Ադրբեջանի կողմից դիվերսիայի փորձ է, և որ խնդիրը պետք է կարգավորվի բանակցությունների միջոցով։
ՊՆ–ն այսօր հայտնեց, որ Ադրբեջանը հերթական սադրանքն է իրականացրել Վարդենիսի և Սիսիանի սահմանային հատվածներում։
ԱԽ նիստ կայացավ նաև այսօր։ Փաշինյանը հայտարարեց, որ հանձնարարել է ՀԱՊԿ պայմանագրով նախատեսված խորհրդակցություններ սկսել։
Ադրբեջանցիները մտածված են եկել, իսկ հիմա պետք է գնան իրենց տեղերը. Սյունիքի մարզպետ
