ԵՐԵՎԱՆ, 12 մայիսի - Sputnik. Սիսիանի խմելու ջրի պատասխանատուները հերքում են Սյունիքի մարզում ջրից թունավորման վարկածը։ «Վեոլիա Ջուր» ընկերության Սիսիանի շահագործման բաժնի պետ Հովհաննես Համբարձումյանը Sputnik Արմենիայի հետ զրույցում վստահաբար հայտարարեց, որ ջրի հետ կապված որևէ խնդիր Սիսիանում չկա։
Նրա խոսքով` ջրից կատարված նմուշառումն ու լաբորատոր հետազոտությունը որևէ շեղում չի արձանագրել։
«Երեկ եկել են և՛ նախարարությունից, և՛ մարզային տեսչությունից, և՛ գլխավոր լաբորատորիայից։ Այցելել են ջրաղբյուր, օրական կարգավորող ջրավազան (ՕԿՋ)։ Ջրի քլորը լաբորատոր հետազոտությունների արդյունքներում կազմել է 0,40-0,50։ Ջրի հետ կապված բոլոր խնդիրները կարգին են եղել»,– ասաց Համբարձումյանը։
Ադրբեջանցիների կողմից ջրի թունավորման հավանակության մասին հարցին Համբարձումյանը կտրականապես բացասական պատասխան տվեց։
«Անհնար է։ Ոնց որ ադրբջանցիները գան, Սիսիանի կենտրոնում ապրեն, տենց բան կլինի՞»,– ասաց նա` հավելելով, որ տարածքը սնուցող ջրաղբյուրը Սիսիանի մաքսատնից դեպի Սիսիան ընկած հատվածում է, որտեղ, նրա խոսքով, ադրբեջանցիների մուտքը բացառված է։
Հիշեցնենք` ՀՀ առղջապահության նախարարությունն այսօր հայտարարել է, որ 2021 թվականի մայիսի 9-ից առայսօր Սիսիան համայնքում արձանագրվել է աղիքային վարակներին բնորոշ ախտանշաններով 296 դեպք (դեպքերից 281-ը մինչև 18 տարեկան են, իսկ 15-ը՝ մեծահասակ):
Որպես զանգվածային թունավորման հավանական պատճառ նախարարությունը նշում է ջրի գործոնը, քանի որ դրանց նախորդել է վթար ջրամատակարարման համակարգում։ Այդ վարկածը ճշտելու համար Սիսիանի խմելու ջրից ու հիվանդների կենսանմուշներից կատարվել է նմուշառում։
