ԵՐԵՎԱՆ, 11 մայիսի – Sputnik. Գրոսմայստեր Լևոն Արոնյանի նախկին մարզիչ Մելիքսեթ Խաչիյանը Շախմատի համաշխարհային կազմակերպության (ՖԻԴԵ) կողմից ճանաչվել է լավագույնը «առաջին մարզիչ» անվանակարգում։ Այդ մասին տեղեկացնում է շախմատային chess-news.ru կայքը։
«Մելիքսեթ Խաչիյանը սկսել է աշխատել Արոնյանի հետ, երբ նա 9 տարեկան էր։ Հետագայում նշանավոր գրոսմայստերը մեկ անգամ չէ, որ գովեստով է խոսել իր առաջին մարզչի մասին»,-նշված է կայքում։
Գլխավոր մրցանակը ստացավ ուզբեկ գրոսմայստեր Ռուստամ Կասիմջանովը, որն օգնել է հնդիկ Վիշվանաթան Անանդին շախմատային թագի համար մղված 3 մրցամարտում։
Չինացի գրոսմայստեր Նի Հուան ճանաչվել է կանանց լավագույն մարզիչ։
Պատանեկան մրցաշարերի լավագույն մարզիչ է ճանաչվել ուզբեկ գրոսմայստեր Սերգեյ Զագրեբելնին։
«Մանկական մարզիչ» (մինչև 14 տարեկան) անվանակարգում լավագույնն է ճանաչվել ռուս Յակով Գելլերը։
