ԵՐԵՎԱՆ, 7 մայիսի – Sputnik. ՀՀ ՄԻՊ Արման Թաթոյանը մտածում է հրաժարական տալու մասին։ Նա մի շարք առաջարկներ է ստացել՝ մեծ քաղաքականություն մտնելու: Տեղեկությունը գրել է «Հրապարակ» թերթը, որն իր այսօրվա համարում անդրադարձել է երեկ ԱԺ–ում ՀՀ ՄԻՊ Արման Թաթոյանի ելույթին ու դրան նախորդած ու հաջորդած դեպքերին։
«Իշխանությունը երեկ չկարողացավ զսպել իր հակակրանքը ՄԻՊ Արման Թաթոյանի նկատմամբ»,–գրում է թերթը։
Նշենք, որ Թաթոյանին, որը մայիսի 6–ին ԱԺ էր գնացել 2020 թվականի հաղորդումը և խոշտանգումների կանխարգելման մեխանիզմի զեկույցը ներկայացնելու, բարկացրեց «Իմ քայլը» խմբակցության պատգամավոր Մարիա Կարապետյանի ելույթը։ Իր ելույթում Կարապետյանը ՀՀ մարդու իրավունքների պաշտպանին մեղադրել էր «մեդիատոռորին միանալու» համար։ Ի պատասխան ՀՀ ՄԻՊ–ը սուր ելույթ ունեցավ և իշխանություններին քննադատեց անգործության համար։
«Գաղտնիք չէ, որ հատկապես պատերազմից հետո ՄԻՊ-ը Հայաստանում դարձել է միակ աշխատող կառույցը, և Թաթոյանի արածը նկատելի է՝ իշխանությունների անգործության ֆոնին, և նրա հեղինակությունը խիստ բարձրացել է։ Իշխանականները սա ծանր են տանում և հրապարակավ քննադատում են Թաթոյանին։ Երեկ ՄԻՊ տարեկան հաշվետվության քննարկումն անցավ կիսադատարկ դահլիճում»,–գրել է թերթը։
«Հրապարակը» գրում է, որ իմքայլականների դատարկ աթոռները դրա վառ ապացույցն էին։ Թաթոյանի մոլեռանդ քննադատ Մարիա Կարապետյանն ԱԺ ամբիոնից փորձեց սևացնել օմբուդսմանի աշխատանքը։
Ի պատասխան, Թաթոյանն իր եզրափակիչ ելույթում նրան տեղը դրեց՝ ասելով , որ մանիպուլյացիա և կեղծիք է տարածում։ Նաև Հանրային հեռուստաընկերությանը խարազանեց, թե դարձել են «իշխանության մարմինների քարոզիչը», իսկ ՄԻՊ աշխատանքը գրեթե չեն լուսաբանում։
«ԱԺ նախագահ Արարատ Միրզոյանն ընդմիջման ժամանակ հենց դահլիճում փորձեց Թաթոյանի հետ հաշիվներ պարզել, թե ինչու է քննադատում իշխանություններին, եթե իրենք իր նկատմամբ լոյալ են։
Վազգեններին շան պես կապել ենք. Թաթոյանը ներկայացրել է հայատյացության նոր դրսևորումները
Ի պատասխան, Թաթոյանը հիշեցրեց Կարապետյանի ելույթը։ Միրզոյանը շարունակեց, թե ի՞նչ կապ ունի Հ1-ն իշխանության հետ։ Հաշտարարի դերը ստանձնած Անդրանիկ Քոչարյանը Թաթոյանին ուղեկցեց իր աշխատասենյակ»,–գրում է թերթը։
Նյութն ամբողջությամբ կարդացեք թերթի այսօրվա համարում։
