ԵՐԵՎԱՆ, 4 մայիսի – Sputnik. ՀՀ կառավարությունն Ազգային ժողովին առաջարկել է շտապ կարգով ընդունել «Ժամկետային զինվորական կամ այլընտրանքային ծառայության հերթական զորակոչից, վարժական հավաքից կամ զորահավաքային զորակոչից խուսափած անձանց նկատմամբ համաներում հայտարարելու մասին» նախագիծը։
Խորհրդարանի որոշմամբ` նախագծի երկրորդ ընթերցումը կկազմակերպվի առաջին ընթերցմամբ ընդունվելուց 3 ժամ հետո։
Արդարադատության փոխնախարար Արմեն Հովհաննիսյանն այսօր ԱԺ–ում ասաց, որ նախագծի նպատակը զինծառայությունից խուսափած անձանց Հայաստան վերադառնալու հնարավորություն ընձեռելն է, որպեսզի նրանք իրենց ավանդը ներդնեն երկրի տնտեսական, սոցիալական, հոգևոր, մշակութային ոլորտները զարգացնելու համար։
«Նախագծի նպատակն է նաև հետպատերազմական հետևանքների հնարավորինս մեղմումը և մարդասիրության ու համերաշխության սկզբունքների դրսևորումը»,– ասաց փոխնախարարը։
Նախագծով նախատեսվում է համաներում հայտարարել մինչև 2020 թվականի սեպտեմբերի 26-ը 27 տարին լրացած շարքային և 35 տարին լրացած պահեստազորային սպաների` պարտադիր զինվորական կամ այլընտրանքային ծառայությունից կամ վարժական հավաքից խուսափած քաղաքացիների համար։ Հովհաննիսյանը, սակայն հայտնեց, որ կառավարությունում որոշել են օրենքը տարածել նաև դրա ուժի մեջ մտնելու օրվա դրությամբ 27 տարին լրացած շարքային և 35 տարին լրացած պահեստազորի սպաների նկատմամբ։
Պատգամավորները նաև հետաքրքրվեցին, թե ինչպես են զորակոչից խուսափելու մեղադրանքով հետախուզման մեջ գտնվող ՀՀ քաղաքացիները վերադառնալու Հայաստան։
«Նախագծում որպես պայման նշված է անձանց կամովին ներկայանալը։ Հետևաբար անձը պետք է ներկայանա համապատասխան մարմիններ, և համապատասխան ընթացակարգերն անցնելուց հետո համաներումը կիրառվի»,– ասաց փոխնախարարը։
Նշենք, որ արդարադատության նախարարության տվյալներով՝ օրենքի ուժ ստանալուց հետո համաներում կստանա ավելի քան 5000 հետախուզման մեջ գտնվող ու 124 դատապարտված անձ։
Նշենք, որ ՀՀ արդարադատության նախկին փոխնախարար, փաստաբան Արթուր Հովհաննիսյանը, Sputnik Արմենիայի եթերում անդրադառնալով համաներման առաջարկին, ասել էր, որ այս նախագիծը բացառապես նախընտրական շրջանի տրամաբանության մեջ տեղավորվող քաղաքական քայլ է, բայց պետությանը ոչ մի օգուտ չի բերելու։
Ըստ նրա`ժամանակին կար այլ օրենք, որով զինծառայությունից խուսափողներին պատասխանատվությունից ազատում էին միայն կոնկրետ, շատ մեծ գումար վճարելու պայմանով, և եթե մի կողմից բանակը համալրման խնդիր ուներ, սակայն մյուս կողմից էլ գոնե գումար էր մտնում պետական բյուջե, ու այդ միջոցները կարելի էր օգտագործել պայմանագրային զինծառայողներ ներգրավելու համար։
