ԵՐԵՎԱՆ, 4 մայիսի – Sputnik. ԱԺ անկախ պատգամավոր Գևորգ Պետրոսյանն առաջարկում է քրեական պատասխանատվության ենթարկել հանրությանը սխալ տեղեկատվություն տրամադրող պաշտոնյաներին։
ՀՀ Քրեական օրենսգրքում համապատասխան փոփոխության նախագիծը, որն արդեն մերժվել էր ԱԺ պետաիրավական հարցերի մշտական հանձնաժողովի կողմից, Պետրոսյանն այսօր ներկայացրեց նաև ԱԺ ամբիոնից, հերթական նիստի ժամանակ։
«Այսօր բարձրաստիճան պաշտոնյաներ` ամոթը գրպանած, ելնում են ու ժողովրդին սխալ տեղեկատվություն են մատուցում։ Հիմա քրեական օրենսգրքում նման պատժատեսակ նախատեսելը նպատակ ունի կանխել նման ստախոսների գործունեությունը»,– ասաց նա։
Իսկ որպեսզի իր հայտարարությունը մերկապարանոց չհնչի, պատգամավորը նաև կոնկրետ պաշտոնյայի անուն հնչեցրեց` կոնկրետ օրինակով, բայց և խնդրեց դա չընկալել որպես կոնկրետ անձի համար «կարվող» նախագիծ։
«Խոսքը ՊՆ խոսնակ, թե լիազորված անձ Արծրուն Հովհաննիսյանի մասին է, ով 43 օր խաբեց, ասաց` հաղթելու ենք, հետո հանկարծ վերջին օրով պարզվեց, որ պարտվում ենք, ի՞նչ հաղթանակ»,– ասաց նա։
Իշխանությունը «Հաղթելու ենք» կարգախոսը փոխարինել է «Լռելու» ենք կարգախոսով. Սեյրան Օհանյան
ԱԺ Պետաիրավական հարցերի հանձնաժողովի անդամ Սիսակ Գաբրիելյանը, հանձնաժողով մերժման հիմքը ներկայացնելով, նշեց, որ Քրեական օրենսգրքում այսօր էլ կա տեղեկատվություն թաքցնելու կամ աղավաղելու համար նախատեսված պատիժ։
Քվեարկության արդյունքում ԱԺ–ը 12 կողմ, 70 դեմ ձայներով մերժեց Պետրոսյանի նախագիծը։
