ԵՐԵՎԱՆ, 27 ապրիլի – Sputnik. Ռուսաստանից Հայաստան զրահաբաճկոններ տեղափոխող երկու բեռնատարները մոտ մեկ ամիս է` գտնվում են «Վերին Լարս» անցակետում։ Օգտատեր Լյուդմիլա Մանուկյանը Facebook-ի իր էջում հայտնել է, որ մեկ ամսից ավելի զրահաբաճկոններով երկու բեռնատարները գտնվում են ռուս-վրացական սահմանի չեզոք գոտում:
Օգտատերը նշել է, որ բեռնատարներն ուղարկվել են Մոսկվայից մարտի 5-ին՝ որպես հումանիտար օգնություն։ Մարտի 28-ին Վրաստանի սահմանապահներն առգրավել են վարորդների փաստաթղթերը՝ արգելելով նրանց առաջ շարժվել: Մանուկյանը գրում է, որ վարորդներն այնտեղ են մոտ մեկ ամիս, բայց հարցը դեռ լուծված չէ։ Կինը նաև տեսանյութ է հրապարակել անցակետից։
Ինչպես Sputnik Արմենիայի թղթակցի հետ զրույցում պատմել է վարորդներից մեկը, հարցը գործնականում լուծված է, և վաղը նրանք կարող են շարժվել դեպի Հայաստան։ Մեկ այլ վարորդ հաստատել է, որ անցակետում գտնվում է մոտ մեկ ամիս՝ հումանիտար բեռի հետ միասին։ Տղամարդու խոսքով՝ նրանց կանգնեցրել են վրացի սահմանապահները՝ նշելով, որ նման բեռը հատուկ նշանակության ապրանք է, և դրա համար անհրաժեշտ է երկրի պաշտպանության նախարարության թույլտվությունը:
«Մենք ցույց տվեցինք բեռը, նրանք համոզվեցին, որ դրանք զրահաբաճկոններ են, և ուրիշ ոչինչ չկա։ Հետո արկղերը նորից կապարակնքեցին, իսկ մենք այդպես էլ մնացինք խնդրի լուծման ակնկալիքով», - ասաց վարորդ Կարենը։
Վարորդը նաև հայտարարել է, որ եթե ֆորս-մաժոր տեղի ունենա, և վաղը նրանց թույլ չտան շարժվել, ապա մտադիր են վերադառնալ Ռուսաստան, քանի որ հոգնել են սպասելուց:
Sputnik Արմենիայի թղթակցի հետ զրույցում ԱԳՆ մամուլի քարտուղար Աննա Նաղդալյանն ընդգծել է, որ Վրաստանում Հայաստանի դեսպանությունը մշտական կապի մեջ է համապատասխան ատյանների հետ:
«Աշխատանք է տարվում հարցի շուտափույթ լուծման ուղղությամբ», — ասաց Նաղդալյանը:
Հիշեցնենք, որ սա առաջին դեպքը չէ, երբ բեռնատարներին թույլ չեն տալիս անցնել «Վերին Լարսը»։ Հիմնականում դա տեղի է ունենում փաստաթղթերի բացակայության պատճառով։
