ԵՐԵՎԱՆ, 26 ապրիլի -Sputnik. Եվրամիությանը պատվաստանյութ մատակարարելու պայմանագրի կատարումը խախտելու համար Եվրոպական հանձնաժողովը (ԵՀ) իրավական ընթացակարգ է սկսել «AstraZeneca» ընկերության դեմ։ Տեղեկությունը հաղորդում է ՌԻԱ Նովոստին:
«Հանձնաժողովն անցած ուրբաթ իրավական ընթացակարգ է սկսել «AstraZeneca»-ի դեմ ՝ կապված պայմանագրերի խախտումների հետ։ Պայմանագրի մի շարք դրույթներ չեն իրականացվել, ընկերությունը չի կարողացել հուսալի ռազմավարություն մշակել` պատվաստանյութի մատակարարումը ժամանակին իրականացնելու համար։ Հանձնաժողովը գործում է ինչպես սեփական, այնպես էլ 27 անդամ պետությունների անունից»,–Բրյուսելում կայացած ճեպազրույցի ժամանակ ասել է ԵՀ ներկայացուցիչը։
Նա հստակեցրել է, որ ԵՄ-ի բոլոր պետություններն աջակցել են այդ քայլին, և այս պահին ձեռնարկվում են բոլոր միջոցները, որպեսզի պատվաստանյութ արտադրողը կատարի մատակարարման իր պարտավորությունները:
Պատվաստվել, թե ոչ. ո՞ր պատվաստանյութն են նախընտրում Շիրակի մարզի բնակիչները
Ավելի վաղ հաղորդվել էր, որ Բրյուսելը պլանավորում է մինչև ամռան կեսերը պատվաստել ԵՄ-ի չափահաս բնակչության 70 տոկոսին, սակայն այդ պլանները կարող են խափանվել մատակարարումների հետ կապված խնդիրների պատճառով։ Մատակարարումների խնդիրներ են առաջանում մասնավորապես «Pfizer/BioNTech», «Moderna» և «AstraZeneca» ընկերությունների հետ կապված:
