ԵՐԵՎԱՆ, 25 ապրիլի – Sputnik․ Հրաժարականից հետո Նիկոլ Փաշինյանի՝ վարչապետի ժամանակավոր պաշտոնակատար լինելն ուղղակիորեն չի հակասում Սահմանադրությանը, սակայն տարամեկնաբանության առիթ տալիս է։ Sputnik Արմենիայի հետ զրույցում նման կարծիք հայտնեց սահմանադրագետ Գոհար Մելոյանը։
Մասնագետների մի խումբ կարծում է, որ երբ վարչապետը հրաժարական է տալիս, այդ հիմքով իր լիազորությունները դադարում են, բայց իր կառավարությունը շարունակում է պաշտոնավարել։
«Հրաժարականից հետո կառավարության անդամները շարունակում են պաշտոնավարել մինչև նոր կառավարության ձևավորումը, ըստ Սահամանդրության վարչապետը ևս համարվում է կառավարության անդամ»,- նշում է Մելոյանը։
Նա հիշեցնում է 2018 թվականը, երբ վարչապետ Սերժ Սարգսյանը հրաժարականի դիմում ներկայացրեց։ Նա չշարունակեց պաշտոնավարել որպես ժամանակավոր պաշտոնակատար։ Դրա համար հիմք կար՝ իր լիազորությունները կատարելու անհնարինության վերաբերյալ փաստաթուղթը, ուստի վարչապետի ժամանակավոր պաշտոնակատար դարձավ առաջին փոխվարչապետը։
Երկրորդ նախադեպը կրկին 2018-ին էր, երբ արդեն վարչապետի պաշտոն զբաղեցնող Նիկոլ Փաշինյանը հրաժարական ներկայացրեց, սակայն շարունակեց պաշտոնավարել որպես ժամանակավոր պաշտոնակատար։
Մելոյանի խոսքով՝ մենք նույնատիպ իրավիճակին առերեսվում ենք արդեն երրորդ անգամ։ Նախորդ երկու անգամները Սահմանադրության համապատասխան դրույթը մեկնաբանվել էր այնպես, որ վարչապետը հրաժարականից հետո հնարավորություն էր ստացել պաշտոնավարել որպես ժամանակավոր պաշտոնակատար։
Ընտրությունները ՀՀ պետականության անփառունակ վախճանի նոր էջ կբացեն․ Աշոտյան
Հիշեցնենք՝ Նիկոլ Փաշինյանն այսօր հրաժարական ներկայացրեց և նշեց, որ շարունակելու է ամբողջ ծավալով կատարել վարչապետի պարտականությունները մինչև արտահերթ խորհրդարանական ընտրությունների արդյունքները։
Հավելենք, որ արտահերթ ընտրությունները նախատեսվում է անցկացնել հունիսի 20-ին։
