ԵՐԵՎԱՆ, 22 ապրիլի – Sputnik. Հայաստանի հանրապետական կուսակցությանը մտահոգել են ՀՀ վարչապետ Նիկոլ Փաշինյանի սյունիքյան այցն ու դրան հաջորդած դեպքերը։
«Խստորեն դատապարտում ենք երկրում շարունակական տեռորի, քաղաքական հետապնդումների, հիմնարար իրավունքների և ազատությունների աղաղակող ոտնահարումների ցանկացած դրսևորում և պահանջում ենք անհապաղ ազատ արձակել բոլոր ձերբակալվածներին»,– նշված է հայտարարության մեջ։
ՀՀԿ–ն շեշտում է` Սյունիքը եղել և մնում է Հայաստանի Հանրապետության ինքնիշխանության և պետականության կենսական հանգույցը, արժանապատիվ գոյության բացառիկ գրավականներից մեկը։
«Տարածաշրջանային որևէ նախագիծ չի կարող իրականացվել Հայաստանի, Արցախի և հայ ժողովրդի կենսական շահերի հաշվին և դրանց անտեսմամբ։
Վերջին զարգացումները ևս մեկ անգամ ապացուցում են, որ կապիտուլյանտ իշխանությունների շարունակվող պաշտոնավարումը անմիջական սպառնալիք է մեր ազգային շահերին։ Մեր համերաշխությունն ու աջակցությունն ենք հայտնում Սյունյաց աշխարհի մեր հայրենակիցներին»,– եզրափակել է ՀՀԿ–ն։
Հիշեցնենք` ՀՀ վարչապետ Նիկոլ Փաշինյանին երեկ` ապրիլի 21–ին, վիրավորական արտահայտություններով ու բողոքի ակցիաներով էին դիմավորել Ագարակում, Մեղրիում ու Կապանում: Իսկ Քաջարան մուտք գործել նրան ընդհանրապես չհաջողվեց, որովհետև բնակիչները փակել էին քաղաքի մուտքը, զոհերի հարազատները` գնացել գերեզման, որ Փաշինյանը չկարողանա մտնել այնտեղ։
Խուլիգանության հոդվածով այսօր բերման են ենթարկել Սյունիքի 16 բնակչի։
«Փաշինյանին քաղցր խոսք է ասել». Շուռնուխի գյուղապետի եղբորը բերման ենթարկելու մանրամասները
Ցուցարարներն այս պահին բողոքի ակցիա են անում ի պաշտպանություն ձերբակալված սյունեցիների։
