ԵՐԵՎԱՆ, 16 ապրիլի - Sputnik. Պաշտոնական Երևանը չի բացառում, որ վետո կդնի ԵԱՏՄ առաջիկա նիստին Ադրբեջանի մասնակցությանը։ Այս մասին այսօր ԱԺ–ում, լրագրողների հետ զրույցում ասաց ՀՀ փոխվարչապետ Մհեր Գրիգորյանը։
«Մոտ ժամանակներս կներկայացնենք մեր դիրքորոշումը։ Նախ, դա վետո չէ, դա համաձայնեցնելու, կամ չհամաձայնեցնելու խնդիր է։ Համաձայնեցնելու խնդիրն ունի ֆորմալ գործընթաց, որը մոտ օրերս կավարտվի, և ես անձամբ կներկայացնեմ ձեզ մեր դիրքորոշումը, որտեղ նաև նշված կլինի մեր` համաձայնություն չտալու հիմքերը»,– ասաց նա` պատասխանելով լրագրողների հարցերին։
Հարցին, թե արդյո՞ք հայկական կողմից որպես նախապայման դրվելու է Ադրբեջանի կողմից գերիների վերադարձը, Մհեր Գրիգորյանը մասնավորապես ասաց. «Ես կարծում եմ, որ Մոսկվայի հետ մեր հարցերը, այդ թվում` գերիների հարցը, քննարկվում է կոնստրուկտիվ ձևաչափով, և կարծում եմ, որ լուծումներ կլինեն։ Եթե սա ևս մեկ առիթ է, ապա նշանակում է, որ այդ առիթը կօգտագործվի»,– ասաց Գրիգորյանը։
Հայաստանը պետք է օգտագործի վետոյի իրավունքը. ԵԱՏՄ–ին Ադրբեջանի անդամակցելը մեզ ոչինչ չի տա
Ըստ ռուսական մամուլի հրապարակումների` Եվրասիական տնտեսական միության (ԵԱՏՄ) անդամ պետությունները քննարկում են կառույցի ղեկավար մարմնի՝ Միջկառավարական խորհրդի ապրիլի 29-ին Կազանում մեկնարկող հերթական նիստին Ադրբեջանի պատվիրակության մասնակցության հնարավորությունը։
