ԵՐԵՎԱՆ, 15 ապրիլի – Sputnik. ԱՄՆ նախագահ Ջո Բայդենը Ռուսաստանի դեմ նոր պատժամիջոցներ սահմանելու մասին հրամանագիր է ստորագրել։ Համապատասխան հաղորդագրությունը հրապարակվել է Սպիտակ տան կայքում։
«Այսօր նախագահ Բայդենը պատժամիջոցների մասին նոր կարգադրություն Է ստորագրել, որը ցույց է տալիս Ռուսաստանի վնասակար արտաքին գործունեությանն արձագանքելու և այն ամբողջ ծավալով զսպելու վարչակազմի վճռականությունը»,– ասված է հաղորդագրության մեջ:
ԱՄՆ-ի իշխանությունները պատժամիջոցներ են սահմանել ռուսական վեց տեխնոլոգիական ընկերությունների դեմ, որոնք, ինչպես նշվում է փաստաթղթում, աջակցություն են ցուցաբերում ռուսական հատուկ ծառայությունների կիբեռծրագրին:
Բայդենը մամուլի ասուլիսի ժամանակ հուշաթերթիկներից է օգտվել
«Այդ ընկերությունները պատասխանատվություն են կրում ՌԴ տնտեսության տեխնոլոգիական ոլորտի աշխատանքի համար։ Օգտագործելով բոլոր մատչելի միջոցները` մենք կշարունակենք ՌԴ-ին պատասխանատվության ենթարկել կիբեռտարածքում այնպիսի չարամիտ գործողությունների համար, ինչպիսին SolarWinds-ի հետ տեղի ունեցած միջադեպն է», - ասված է փաստաթղթում:
Սահմանափակումներ են մտցվել նաև 32 ֆիզիկական և իրավաբանական անձանց նկատմամբ, որոնք, ըստ հաղորդագրության, իրականացրել են ԱՄՆ-ի 2020 թվականի նախագահական ընտրությունների վրա ազդելու Ռուսաստանի կառավարության փորձերը։
