Համանախագահների հայտարարությունն առաջին հերթին ուղղված է Ադրբեջանին, որովհետև պաշտոնական Բաքուն է խոչընդոտում ցանկացած ելումուտ դեպի Լեռնային Ղարաբաղ` համարելով, որ «տարածքային ամբողջականության» խնդիրն արդեն իսկ լուծել է, և իրենք կարող են որոշել` ովքեր կարող են մտնել Լեռնային Ղարաբաղ, ովքեր`ոչ։ Sputnik Արմենիայի հետ զրույցում նման կարծիք հայտնեց Ամերիկյան հետազոտությունների հայկական կենտրոնի տնօրեն Սուրեն Սարգսյանը` անդրադառնալով ԵԱՀԿ Մինսկի խմբի համանախագահների հայտարարությունը։
Նրա կարծիքով`սա հայկական կողմի համար բավականին կարևոր օրակարգ է, և Հայաստանը պետք է սկսի ակտիվ աշխատել Մինսկի խմբի համանախագահության շրջանակում, որ կարողանա գոնե դիվանագիտական ճանապարհով Հայաստանի և Արցախի համար որոշակի սկզբունքային և մեկնարկային իրավիճակ ապահովել։
Սարգսյանի խոսքով` բանակցություններն առաջին հերթին պետք է լինեն միջազգային իրավունքի բոլոր սկզբունքների շուրջ. եթե Ադրբեջանը ուժով փորձել է վերականգնել, այսպես կոչված, իր «տարածքային ամբողջականությունը» և ուշադրություն չի դարձրել ազգերի ինքնորոշման սկզբունքի վրա, մենք պետք է սկսենք Արցախի միջազգային ճանաչման գործընթաց, որը ամենակարևոր առաջնահերթություններից է։
«Մեր դիվանագիտությունը տարբեր երկրներում կարող է սկսել Արցախի ճանաչման գործընթաց, որը կստիպի Ադրբեջանին արդեն նստել բանակցությունների սեղանի շուրջ և բավարարել ոչ միայն իր ցանկություններն ու ամբիցիաները, այլև մյուս կողմի ցանկությունները»,- հավելել է նա։
Սարգսյանը, սակայն, արձանագրում է`գործող իշխանությունները բանակցություններ վարելու ունակություն չունեն։
Ադրբեջանը հետախուզում է հայտարարել 300 հայ պաշտոնյայի նկատմամբ, ՀՀ–ն՝ ադրբեջանցի 1 խոսնակի
«Ես այնքան էլ լավատես չեմ, որ ներկա իշխանությունների օրոք մենք կկարողանանք ինչ-ինչ ձեռքբերումներ ունենալ բանակցային սեղանի շուրջ, բայց այս իշխանությունները գոնե այսօր պետք է այս գործընթացը սկսեն, որպեսզի վաղվա իշխանություններին թողնեն գոնե նպաստավոր բանակցային միջավայր»,- նշեց նա։
Հիշեցնենք`ԵԱՀԿ Մինսկի խմբի համանախագահները հայտարարել են, որ կարող են վերսկսել ղարաբաղյան ուղևորությունները, բայց հակամարտության կողմերը պետք է ապահովեն նրանց համար անարգել մուտքն ու երթուղիների առավելագույն ճկունությունը։
ՌԴ-ի, Ֆրանսիայի և ԱՄՆ-ի միջնորդների համատեղ հայտարարությունը հրապարակվել է ԵԱՀԿ–ի կայքում։
