ԵՐԵՎԱՆ, 14 ապրիլի – Sputnik․ ԼՂ հակամարտության վերջնական կարգավորում կարող է համարվել միայն քաղաքական բանակցված կարգավորումը, որը հաշվի կառնի կողմերի իրավունքները և կորոշի Արցախի կարգավիճակը` հիմնված ինքնորոշման իրավունքի վրա։ Այսօր ԱԺ–ում մեկնաբանելով ԵԱՀԿ ՄԽ համանախագահների երեկվա հայտարարությունը, այս մասին ասաց ՀՀ արտգործնախարար Արա Այվազյանը։
«Համանախագահները փաստում են, որ նոյեմբերի 9-ի հայտարարության ոչ բոլոր դրույթներն են կյանքի կոչվել և կոչ են անում քայլեր ձեռնարկել մարդասիրական իրավունքի շրջանակներում գերիների և այլ պահվող անձանց անհապաղ հայրենադարձության, Արցախ` միջազգային մարդասիրական կազմակերպությունների մուտքի և մշակութային ժառանգության վերաբերյալ։ Սա ևս մեկ անգամ միջազգային հանրության, այս անգամ` ՄԽ համանախագահների միջոցով հերթական կոչն է Ադրբեջանին` կատարել նոյեմբերի 9-ի եռակողմ հայտարարությամբ իր վրա վերցրած հանձնառությունները և միջազգային պարտավորությունները և հրաժարվել ապակառուցողական դիրքորոշումներից»,– ասաց Այվազյանը։
ՄԽ համանախագահների երրորդ ուղերձը, նրա խոսքով, կողմերին արված կոչն է բարձր մակարդակով խորհրդակցույուններ սկսելու։ ՀՀ ԱԳ նախարարը շեշտեց, որ Հայաստանը երբեք չի խուսափել հանդիպումներից, բայց դրանց կայացման համար, նրա դիտարկմամբ, պետք է ստեղծել ձևաչափ և օրակարգ։ Մինչդեռ Ադրբեջանն իր ռազմատենչ ու հայատյաց հայտարարություններով ու դիրքորոշմամբ խոչընդոտում է նման մթնոլորտի ձևավորմանը։
«Մինսկի խմբի համանախագահների հայտարարությունը շատ օգտակար էր». վարչապետն ասաց` ինչու
Հիշեցնենք` ապրիլի 13-ին տարածած հայտարարության մեջ ԵԱՀԿ Մինսկի խմբի համանախագահները ԼՂ հակամարտության կողմերին կոչ էին արել իրենց հովանու ներքո որքան հնարավոր է շուտ վերսկսել բարձր մակարդակի քաղաքական երկխոսությունը, ուղիղ երկկողմ խորհրդակցությունների միջոցով առանց նախապայմանների քննարկել և համաձայնեցնել իրենց առաջնահերթությունները արտացոլող համատեղ օրակարգ։
Մինսկի խմբի համանախագահները չեն կարողանում պատերազմից հետո Արցախ այցելել. Մարուքյան
