Հայրենիքի փրկության շարժման մարզային այցելությունները չեն դադարեցվել, առաջիկա օրերին դրանք կշարունակվեն։ Sputnik Արմենիայի հետ զրույցում ասաց ՀՅԴ ԳՄ ներկայացուցիչ Իշխան Սաղաթելյանը` մեկնաբանելով մամուլում տարածված այն տեղեկությունները, թե շարժումը «թայմաութ» է վերցրել և դադարեցրել է մարզային այցելությունները։
«Եղանակային պայմանները աշխատանքային օրվա ավարտից հետո անցկացվող հանդիպումների համար բարենպաստ չեն, դրա համար էլ հիմնական ծանրաբեռնվածությունն ընկնում է շաբաթ կամ կիրակի օրերի վրա»,- ասաց նա։
Նրա խոսքով` մարզային այցելություններին շարժման առաջնորդը հիմնականում ներկա է լինում։
Սաղաթելյանի կարծիքով` շարժումը չի մարել, իսկ որոշակի դադարը պայմանավորված է շարժման մաս կազմող անդամ-կուսակցությունների` առաջիկա զարգացումների վերաբերյալ արտահայտած դիրքորոշումներով։
«Շարժումը կա, պահպանվել է, այլ ձևաչափ չկա. աշխատանքների որոշակի պասիվությունը պայմանավորված է նաև դրանով, հուսով եմ` առաջիկայում ավելի ակտիվ կլինեն»,- նշեց դաշնակցական գործիչը։
Հարցին, թե հնարավո՞ր է, որ առաջիկայում ՀՅԴ-ն ևս ԲՀԿ-ի, «Հայրենիք» կուսակցության օրինակով հայտարարի հունիսի 20-ի ընտրություններին առանձին կամ դաշինքով մասնակցության մասին, Սաղաթելյանը հորդորեց սպասել մինչև կհայտարարվի ընտրությունների անցկացման մասին։
«Երբ պաշտոնապես հայտարարվի ընտրությունների անցկացման մասին, այն ժամանակ ՀՅԴ-ն կհայտնի իր դիրքորոշումը»,- հավելեց Սաղաթելյանը։
Եթե որոշեմ մասնակցել այս ընտրություններին, ապա դա կանեմ իմ դեմքով. Միքայել Մինասյան
Հիշեցնենք` ապրիլի 6-ին «Պոզներ» հաղորդման եթերում ՀՀ երկրորդ նախագահ Ռոբերտ Քոչարյանը հայտարարել էր, որ Ազգային ժողովի արտահերթ ընտրություններին մասնակցելու է դաշինքով, որն ամենայն հավանականությամբ բաղկացած կլինի 2 կուսակցություններից։
Թե որոնք են այդ երկու քաղաքական ուժերը, առայժմ չի հայտարարվում։ Բայց մամուլում լուրեր են շրջանառվում, որ այդ կուսակցություններից մեկը կարող է լինել ՀՅԴ-ն, մյուսը, ըստ ամենայնի` ԲՀԿ–ն։
