ԵՐԵՎԱՆ, 12 ապրիլի - Sputnik. Զինծառայողների ապահովագրության հիմնադրամի տնօրեն Վարուժան Ավետիքյանը վայր է դնում լիազորությունները: Տեղեկությունը հրապարակել է Ավետիքյանն ինքը` ֆեյսբուքյան իր էջում գրառում անելով։
«Այս որոշումս, որը մանրամասն քննարկել եմ հիմնադրամի նորանշանակ խորհրդի հետ, պայմանավորված է նրանով, որ հիմնադրամի առջև ծառացել են բոլորովին նոր մարտահրավերներ, և այն պետք է ղեկավարվի ոչ թե հասարակական հիմունքներով աշխատող տնօրենի կողմից, այլ ունենա լրիվ դրույքով աշխատող տնօրեն»,-ասում է նա։
Ավետիքյանի խոսքով` վերջին պատերազմն ու դրա արդյունքները ցավալիորեն փոխեցին շատ բան. հիմա ժամանակն է, որ հիմնադրամն անցնի տրանսֆորմացիայի փուլ:
Միաժամանակ, Ավետիքյանը հայտնել է, որ պատերազմից հետո հիմնադրամն այս պահին հատուցումներ է կատարում 1939 զոհված զինծառայողների ընտանիքների, 265 ծանր վիրավորում ստացած զինծառայողների և 1055 անհետ կորած զինծառայողների ընտանիքների։
Վերջին պատերազմից ի վեր հիմնադրամը կարողացել է 8 միլիարդ դրամից ավելի նվիրաբերություններ հավաքագրել ավելի քան 40 երկրների հայերից ու կազմակերպություններից:
Արցախում զոհվածների ու վիրավորվածների 1671 ընտանիքներ հիմնադրամից փոխհատուցում են ստացել
Ավետիքյանը հայտնել է, որ առաջիկա օրերին կհրապարակեն հիմնադրամի նոր գործադիր տնօրենի պաշտոնի մրցույթի վերաբերյալ հայտարարություն, սակայն մինչև նոր տնօրենի ընտրությունը նա կշարունակի կատարել պարտականությունները։
Դրանից հետո այլ կարգավիճակով է ծառայելու հիմնադրամին:
