ԵՐԵՎԱՆ, 12 ապրիլի - Sputnik. 2020թ.-ի կոռուպցիոն քրեական գործերով, նախորդ տարվա համեմատ, 26.6%-ով ավելի շատ բարձրաստիճան պաշտոնատար անձինք են քրեական հետապնդման ենթարկվել։ Տեղեկությունը հայտնում է ՀՀ դատախազությունը` հավելելով, որ ամփոփել են նախորդ տարվա կոռուպցիոն բնույթի հանցագործությունների դեմ քրեաիրավական պայքարի արդյունքները:
«2020թ.-ի ընթացքում կոռուպցիոն բնույթի հանցագործությունների վերաբերյալ նախապատրաստվել է 1810 նյութ, որոնցից 1232-ով հարուցվել են քրեական գործեր: Այսինքն` 2019թ.-ի համեմատ 2020թ. 11.9%-ով կամ 167-ով նվազել է կոռուպցիոն բնույթի դեպքերով հարուցված քրգործերի քանակը»,–նշված է դատախազության հաղորդագրության մեջ։
2020թ.-ի ընթացքում քննված կոռուպցիոն բնույթի քրեական գործերով քրեական հետապնդման ենթարկված անձանցից 671-ը պաշտոնատար անձինք և հանրային ծառայողներ են, ընդ որում՝ նրանց թիվը 2019թ.-ի համեմատ ավելի է 26.6%-ով: Նրանց թվում են ՀՀ պաշտոնաթող նախագահ, ԱԺ նախկին նախագահ, պատգամավոր, նախարարներ, նախարարի տեղակալներ, ՍԴ նախագահ, դատավորներ, քաղաքաշինության կոմիտեի նախագահ, ԲՈՀ-ի նախկին նախագահ, ոստիկանության պետ, ՀՀ նախկին դեսպան, բուժհաստատությունների տնօրեններ, բուհերի ռեկտորներ և պրոռեկտորներ, դպրոցների տասնյակ ներկա ու նախկին տնօրեններ, փոխտնօրեններ, ԶՈւ շուրջ 150 պաշտոնատար անձինք, ՀՕՊ զորքերի վարչության նախկին պետ, Երևան քաղաքի վարչական շրջանի ներկա ու նախկին ղեկավարներ, համայնքների 100-ից ավելի ներկա ու նախկին ղեկավարներ և այլն։
Բիզնեսով զբաղվող պաշտոնյաներ, գույքի հայտարարագրում. կոռուպցիայի դեմ քայլեր են արվում
2020թ.-ին հաջողվել է ավարտել կոռուպցիոն բնույթի 716 քրեական գործի վարույթ, որից 183 քրեական գործ մեղադրական եզրակացությամբ ուղարկվել են դատարան: Տարվա ընթացքում կոռուպցիոն բնույթի 2535 քրեական գործով քրեական հետապնդման է ենթարկվել ընդհանուր 1356 անձ, ինչը 2019թ.-ի համեմատ ավելի է 7.3%-ով։
Բացի այդ, կոռուպցիոն բնույթի ավարտված նյութերով և ավարտված քրեական գործերով 2․5 մլրդ ՀՀ դրամի չափով ավելի վնաս է վերականգնվել (2019թ․-ին՝ 2 մլրդ դրամ, 2020թ․-ին՝ 4․5 մլրդ դրամ գումար)։
