ԵՐԵՎԱՆ, 9 ապրիլի – Sputnik. ՀՀ պաշտպանության նախարարության մոտ երեկ առավոտից բողոքի ակցիա իրականացնող անհետ կորած զինծառայողների հարազատների մի խումբ` մոտ 50 մարդ, հանդիպում է ԳՇ պետ Արտակ Դավթյանի հետ` ստեղծված իրավիճակը քննարկելու համար։ Տեղեկությունը Sputnik Արմենիային հայտնեց Գլխավոր շտաբում մեր աղբյուրը։
Նրա խոսքով` ուղղաթիռով ՊՆ-ի աշխատակիցների տարհանումն այս պահին դադարեցվել է։ Պատճառը խանգարող քամին է, նաև խոսակցություններ կան, որ ակցիա իրականացնողներից մեկը սպառնացել է ինքնահրկիզվել, եթե շարունակեն աշխատակիցների` ուղղաթիռով շենքից դուրս բերումը։
Հիշեցնենք, որ ապրիլի 8–ի առավոտից մինչ հիմա անհետ կորած զինծառայողների հարազատները շրջափակել են ՊՆ–ի մուտքերն ու ելքերը։ Արդեն 2 օր է` ՊՆ և ԳՇ աշխատակիցները չեն կարողանում դուրս գալ աշխատավայրից։
Sputnik Արմենիայի տեսախցիկը քիչ առաջ ֆիքսել էր, որ ուղղաթիռով ՊՆ աշխատակիցներին տարհանում են։ Աշխատավայրը լքում են առաջին հերթին հղիները, առողջական խնդիրներ ունեցող կանայք։
Երեկ երեկոյան պաշտոնական լուրեր տարածվեցին, որ գերիների նոր խումբ է վերադառնում Հայաստան։ Ադրբեջանում պահվող անձանց ծնողներն ու հարազատները հավաքվեցին «Էրեբունի» օդանավակայանում, սակայն ավելի ուշ փոխվարչապետ Ավինյանի գրասենյակը հայտարարեց, որ գերիների վերադարձ չի հաջողվել կազմակերպել։
Դրանից հետո ռազմագերիների հարազատները միացան ՊՆ–ի մոտ հավաքված անհետ կորածների հարազատներին։