ԵՐԵՎԱՆ, 3 ապրիլի - Sputnik. Եռաբլուրում այսօր տեղի ունեցավ պատերազմի զոհերից Հայկազ Զավենի Մկրտչյանին հետմահու պարգևատրման արարողությունը։
Հայկազ Մկրտչյանը մասնակցել է նաև 2020-ի հուլիսյան մարտերին, պարգևատրվել Մարտական հերթապահության շքանշանով։
Վերջին պատերազմին մասնակցության համար Մկրտչյանը ՀՀ նախագահի կողմից պարգևատրվել է Մարտական ծառայության շքանշանով։
Եռաբլուրում` հենց Հայկազ Մկրտչյանի շիրիմի մոտ, երրորդ բանակային կորպուսի անձնակազմը նախագահի շքանշանը հանձնեց նրա հորը։
«Տղաս շատ ազնիվ էր, անարդարությունը չէր հանդուրժում։ Ինձ պատմում էր, երբ առաջին անգամ` դեռ հուլիսյան մարտերին, ասացին` Հայկո, պիտի կրակենք, հասկացա, որ ուսումնական վարժանք չէ։ Ասում էր` ինձ հավաքեցի, ասացի, որ հեքիաթ չէ եղածը և անցա գործի»,–լրագրողների հետ զրույցում պատմեց Հայկազի մայրը` տիկին Աննան։
Հայկազ Մկրտչյանը հոկտեմբերի 29-ի երեկոյան է զոհվել` Կարմիր շուկայի համար մղված մարտերի ժամանակ։ Մայրը որդու հետ դեպքից 1-1.5 ժամ առաջ է խոսել։
«Տղաս խոստացավ երեկոյան գրել ինձ ու ասել, որ այսօր էլ ամեն ինչ անցավ, սակայն այդպես էլ նրանից լուր չստացա։ Ասում էր` մամ, մինչև ես չգնամ, կռիվը չի վերջանա։ Ինձ հուսադրում էր, թե` մամ, ես անմահ եմ, չգիտես»,–պատմեց տիկին Աննան։
Նա ասում է, որ տղան անվախ էր և ընկճվում էր միայն այն ժամանակ, երբ նահանջի հրաման էին տալիս։ Ավելին, բացի մոտը եղած վերջին փամփուշտից, ամենաթեժ պահերին նաև ձեռքին բացած դանակ էր պահում, որ հանկարծ գերի չընկնի։
Տիկին Աննան, անդրադառնալով ներկայիս իրավիճակին, նշեց, որ իշխանությունից ոչ միայն հրաժարական, շատ բան է պահանջում։ Նրա խոսքով` այդքան զոհեր մենք չպետք է ունենայինք։
Երբեմն 20 մայր տարբեր գերեզմաններից լալիս են ու ողբում. Եռաբլուրի քահանան տեսել է դժոխքը
«Հողերի հանձնումը, գերիների հարցերը` այնպիսի տպավորություն է, որ զուգահեռ իրականության մեջ ենք ապրում. մի կողմից որդեկորույս մայրերը, մյուս կողմից, իշխանությունը շարունակում է իր գործն անել` ասես ոչինչ չի եղել»,–ասաց տիկին Աննան։
Հայկազ Մկրտչյանի հրամանատարական կազմից ասացին` Հայկազը ոչ մի անգամ չի երկմտել իր առջև դրված մարտական խնդիրը կատարելու գործում։
