ԵՐԵՎԱՆ, 2 ապրիլի – Sputnik. Առաջիկա երկու ամիսներին Հայաստանում ձվի կայուն գին կսահմանվի: Ապրանքի նոր թանկացում չի սպասվում։ Հայաստանի Թռչնաբույծների միության նախագահ Սերգեյ Ստեփանյանը Sputnik Արմենիայի թղթակցի հետ զրույցում նշեց, որ մի շարք քայլեր են նախաձեռնել, որոնք թույլ կտան հավասարակշռել իրավիճակը շուկայում:
Հայաստանում ձվի գներն աճել են 3-4 անգամ։ Եթե մինչև 2020 թ․-ի սեպտեմբեր հնարավոր էր մեկ հավկիթը ձեռք բերել 30 դրամով, ապա հիմա այն 100-120 դրամ արժե։ Գնաճի վրա մի շարք գործոններ են ազդել, այդ թվում՝ կորոնավիրուսի համավարակի ֆոնին մատակարար երկրներում կերի պաշարների սպառման վախը: Արդյունքում արդեն այսօր գրեթե անհնար է եգիպտացորեն ձեռք բերել։
Համակցված կերերի գնի բարձրացման մասին ավելի վաղ լրագրողների հետ զրույցում հայտարարել էր նաև Հայաստանի Տնտեսական մրցակցության պաշտպանության պետական հանձնաժողովի նախագահ Գեղամ Գևորգյանը:
«Համակցված կերերի և այլ մթերքների գները փոփոխվում են ամեն շաբաթ: Ենթադրենք՝ արևածաղկի ձեթը դեռ անցած շաբաթ գնում էին մեկ տոննայի դիմաց 800 դոլարով, հիմա արդեն՝ 1800 դոլարով։ Իսկ եգիպտացորենը, որը կազմում է համակցված կերի 35%-ը, առհասարակ հնարավոր չէ ճարել»,-ասաց Ստեփանյանը։
Նա պարզաբանեց, որ աշխարհում անկայուն իրավիճակի պատճառով այն երկրները, որոնց հետ աշխատում էր Հայաստանը, կրճատել են արտահանման ծավալները, նրանց ապրանքը պահեստավորում են սեփական կարիքների համար։ Բացի այդ, գնագոյացման վրա ազդել է նաև ածան հավերի թվի կտրուկ նվազումը։ Արցախում պատերազմի պատճառով հավերի մատակարարման հետ խնդիրներ են ծագել։
Ստեփանյանը նշեց, որ եթե կարողանային ածան հավեր ներկրել սեպտեմբերի սկզբին, ոչ թե դեկտեմբեին, ապա այս ընթացիկ խնդիրները չէին լինի։ Փետրվարի վերջից երկրում բավարար քանակով ձու կլիներ և չէր հանգեցնի այսպիսի գնաճի։
«Երբ ձվի և ածան հավերի քանակը կրճատվում է, դա հանգեցնում է գնի բարձրացման, ինչը խուճապ է առաջացնում բնակչության շրջանում»,-ասաց Ստեփանյանը։
Ինկուբացիոն ճտերը, որոնք ձեռք էին բերվել նախորդ տարվա վերջին, աստիճանաբար հասնում են ձվատվության փուլին։ Ստեփանյանը նշեց, որ դրա շնորհիվ կհաջողվի պահպանել ընթացիկ գինը։ Բացի այդ, խանութներում և սուպերմարկետներում ձվի ձեռքբերման արհեստական սահմանափակում է սահմանվել։
«Մոտակա ժամանակներում գինը կկայունանա, բացի այդ՝ չարժե թանկացում սպասել մոտակա երկու ամսում»,-ասաց Ստեփանյանը։
Եթե ձվի հարցում ամեն ինչ բարդ է, ապա հացահատիկի դեպքում որոշակի կայունություն կա։ «Մանանա Գրեյն» ալրաղաց ձեռնարկության (խոշորագույններից մեկն է երկրում) ղեկավար Գուրգեն Նիկողոսյանը Sputnik Արմենիայի թղթակցի հետ զրույցում նշեց, որ ամենաքիչը աճել են հացաբուլկեղենի գները։
Չնայած հացահատիկի գների աճին, հայ ներկրողներին հաջողվել է բավարար քանակությամբ ցորեն գնել՝ իրավիճակը հավասարակշռելու համար։ Այս միտումը կպահպանվի մոտակա երկու-երեք ամիսը՝ մինչև նոր բերքը։
Այս պահին երկրում մոտ 1․1 միլիոն ձու կա։
Վիճակագրական կոմիտեի տվյալներով՝ Հայաստանում տարեկան միջինում 700 միլիոն ձու է սպառվում։ Վերջին երկու տարում սպառման աճ է գրանցվել։ 2018թ․-ին այն կազմում էր 726,8 միլիոն հատ, 2019թ․-ին՝ 720,6 միլիոն, իսկ 2020թ․-ին՝ 754,6 միլիոն։
Օրերս Գևորգյանը հիշեցրել էր 2020թ․-ին շուկայում դեմպինգի մասին։ Այն ժամանակ ՏՄՊՊՀ-ն մոտ 7 տնտեսվարող սուբյեկտի տուգանել էր 103-104 միլիոն դրամի չափով: Եթե կրկնակի խախտումներ արձանագրվեն, ապա պետական հանձնաժողովը կրկին կտուգանի ընկերություններին։
Նախորդ տարվա ձվի թանկացման տուգանքը դեռ չվճարած` արտադրողները նոր «խաղեր» են սկսել
