Անի Սամսոնյանի դիտարկմամբ` անհրաժեշտ է օր առաջ հանգուցալուծել ներքաղաքական ճգնաժամը։ Երկիրն այս ծանր վիճակից հանելու համար պետք է հնարավորինս շուտ լինեն արտահերթ ընտրություններ, որովհետև Հայաստանի զարգացումն այս պահին «խցանվել է»։ Ըստ նրա` իշխանությունը պետք է փոխվի, որպեսզի երկիրը դուրս գա խցանումից և լուծվեն բոլոր պրոբլեմները` սկսած սահմանային անվտանգության խնդիրներից, վերջացրած սոցիալ–տնտեսական բնույթի հիմնահարցերով։
«Մեզ համար շատ կարևոր էր ժամկետներն արձանագրել շատ արագ, թույլ չտալ, որ ընտրությունները կայանան աշնանը։ Այսօր կան շատ մարդիկ, ովքեր ունեն ճամպրուկային տրամադրություն։ Նրանց մոտ կա մեծ հիասթափություն։ Կան մարդիկ, ովքեր ցանկանում են ներդրումներ կատարել, բայց չգիտեն, թե երկրում ինչ զարգացումներ կլինեն։ Շատերն էլ հոգնել են ներքաղաքական գզվռտոցներից։ Որպեսզի մարդկանց սպասողական վիճակի մեջ չթողնենք, պետք է լինեն արտահերթ ընտրություններ, որպեսզի մարդիկ տեսնեն, որ կան փոփոխություններ, և շատ կարևոր է, որ այդ ընտրություններից հետո այդ փոփոխություններն իրենց զգացնել տան»,– նշեց ԱԺ «Լուսավոր Հայաստան» խմբակցության պատգամավորը։
Անդրադառնալով Ընտրական օրենսգրքի ակնկալվող փոփոխություններին` Սամսոնյանն ընդգծեց, որ իրենք դեմ են ռեյտինգային ընտրակարգի չեղարկմանը, որովհետև այդ դեպքում ԱԺ–ն կվերածվի երևանյան ակումբի, քանզի մարզերը ներկայացնող մարդիկ կզրկվեն տարածքային ցուցակներով ընտրություններին մասնակցելու հնարավորությունից։
