ԵՐԵՎԱՆ, 24 մարտի - Sputnik. Սու-30ՍՄ ինքնաթիռները Հայաստան են եկել 2020թ-ի մայիսին, իրականացրել են վարժական թռիչքներ, որոնց ընթացքում օգտագործել են Հայաստանի զինանոցում նախկինում արդեն առկա հրթիռները:
Այսօր ԱԺ-ում հայտարարեց ՀՀ վարչապետ Նիկոլ Փաշինյանը՝ ԱԺ փոխնախագահ Ալեն Սիմոնյանի խնդրանքով մեկնաբանելով ՍՈՒ- 30-ների շուրջ համացանցում տարածված իրարամերժ պաշտոնական հայտարարությունները:
«Կոնկրետ ռազմական իրավիճակում դրանց օգտագործման կամ չօգտագործման որոշումները կայացվել են ըստ այնմ, թե եղած սպառազինությունը որքանով է հնարավորություն տալիս, որպեսզի այդ ինքնաթիռները կատարեն իրենց առջև դրված մարտական խնդիրները: Եվ այն, ինչ ասել եմ Օհանավան գյուղում և այն, ինչ նախկինում հայտարարել եմ, այդ հայտարարությունները, էլի եմ ասում, մեկը մյուսին չեն հակասում»,- ասաց վարչապետը՝ վերահաստատելով իր վերջին հայտարարությունն այն մասին, որ պատերազմի ժամանակ Հայաստանը չէր հասցրել գնել ինքնաթիռների համար անհրաժեշտ ողջ սպառազինությունը:
Ընդդիմադիր «Լուսավոր Հայաստան» խմբակցության պատգամավոր Անի Սամսոնյանին, սակայն, վարչապետի պարզաբանումը չբավարարեց ու նա խնդրեց պատասխանել՝ ե՞րբ է իշխանությունը դադարելու ստել, մանիպուլացնել ու հասարակության համար ստեղծել մի իրավիճակ, որ մարդիկ խճճվեն այդ ստի մեջ:
Փաշինյանի փոխարեն հարցին պատասխանեց փոխվարչապետ Տիգրան Ավինյանը, ինչը առաջ բերեց պատգամավորի ծիծաղը:
Փոխվարչապետը հայտարարեց. «Այդ հարցի պատասխանը հնչեց ու այդ մասով ավելացնելու բան չկա»:
Հիշեցնենք՝ մարտի 20-ին Արագածոտնի մարզի Օհանավան համայնքի բնակիչների հետ հանդիպման ժամանակ ՀՀ վարչապետ Նիկոլ Փաշինյանը հայտարարել էր. «Այո՛, մենք ինքնաթիռ ենք գնել, որոնք մայիսին են բերվել և այո, չենք հասցրել հրթիռները մինչև պատերազմը ձեռք բերել։ Բա ինքնաթիռները դուք ձեռք բերեիք, որ մենք էլ հասցնեինք հրթիռները ձեռք բերել։ 26 տարվա պետությունը ինչու չուներ կործանիչ ավիացիա»:
Հայ-ռուսական հարաբերություններն ու արցախյան պատերազմը. ո՞րն է Փաշինյանի մեղքը
Իսկ 2020թ. հուլիսի 3-ին վարչապետ Նիկոլ Փաշինյանը «Ֆեյսբուքի» իր էջում գրել էր «Մեր Սու-30ՍՄ-ները երեկ «մարտական խոցումով» առաջին վարժական թռիչքներն են իրականացրել, փորձարկելով երկինք-երկիր հրթիռներ՝ «գրոհային գործողության» համար։ Բոլոր թիրախները խոցվել են բարձր ճշգրտությամբ»։
ՀՀ ՊՆ ռազմական վերահսկողության ծառայության նախկին պետ Մովսես Հակոբյանն էլ հայտարարել էր, որ Ռուսաստանից ձեռք բերված Սու-30ՍՄ կործանիչները առանց զինամթերքի են եղել, քանի որ Ռուսաստանը 130 կմ հեռահարությամբ «օդ-օդ» հրթիռներ չի վաճառում այլ երկրի, ինչի պատճառով էլ մեր ՍՈւ–երը չեն օգտագործվել պատերազմի ժամանակ: Հայաստանի իշխանություններն այդ հայտարարությունը չէին հաստատել։
