Ֆրանսիացիների ավելի քան մեկ քառորդը (26%) կցանկանար պատվաստվել ռուսական «Սպուտնիկ V» պատվաստանյութով, եթե նման հնարավորություն ունենար։ Այս մասին են վկայում հարցման տվյալները, որը Sputnik ռադիոկայանի պատվերով իրականացրել է IFop ընկերությունը։
Ամենահետաքրքիրն այն է, որ արդեն պատվաստված հարցվողների շրջանում ռուսական դեղամիջոցով պատվաստվելու ցանկություն են հայտնել 41 տոկոսը։ Ընդ որում, եվրոպացիների շրջանում ֆրանսիացիներն առավել անհանդուրժող են հակակովիդային սահմանափակումների հարցում։ Ավելի քան մեկ երրորդը կարծում է, որ կարանտինի վնասն ավելին է, քան կորոնավիրուսի բռնկման վտանգը:
Ինչպե՞ս են փոխվել Ֆրանսիայի բնակիչների տրամադրությունները համավարակի ընթացքում։ Ներկայացնում ենք հարցման արդյունքներն ու փորձագետների կարծիքները Sputnik ռադիոկայանի եթերում:
«Զարմանալի չէ, որ ֆրանսիացիների մեկ քառորդը պատրաստ է պատվաստվել ռուսական պատվաստուկով։ «Սպուտնիկ V»-ն ընդհանուր առմամբ լավ ցուցանիշներ ունի։ Համաշխարհային մակարդակի պատվաստանյութ է», - կարծում է ՌԴ ԱԳՆ Դիվանագիտական ակադեմիայի միջազգային արդի խնդիրների կենտրոնի ղեկավար, քաղաքական գիտությունների դոկտոր Տատյանա Զվերևան։
«Ֆրանսիան Ռուսաստանի հանդեպ այլ վերաբերմունք ունի, քան եվրոպական շատ երկրներ։ Եթե ԵՄ-ում ռուսական պատվաստանյութը գրանցվեր, ֆրանսիացիների 15-20 տոկոսը կնախընտրեր այն։ Սա նորմալ երևույթ է», - ասում է ՌԳԱ Համընդհանուր պատմության ինստիտուտի ավագ գիտաշխատող, Ֆրանսիայի գծով փորձագետ Եվգենի Օսիպովը։
«Մարդիկ հոգեբանորեն հոգնել են սահմանափակումներից, կարանտինից։ Իսկապես, ոմանց թվում է, թե իշխանության կիրառած միջոցները հակասում են միմյանց, ոչ մի արդյունքի չեն հանգեցնում, այլ միայն հոգեբանորեն ավելի շատ են ճնշում մարդկանց», - նշել է Ռուսաստանի գիտությունների ակադեմիայի Եվրոպայի ինստիտուտի առաջատար գիտաշխատող Սերգեյ Ֆյոդորովը։
«Սպուտնիկ V»–ի նոր խմբաքանակ կունենանք. ի՞նչ փուլում է Covid-19-ի դեմ պատվաստումների հարցը
Ընդհանուր առմամբ, հարցումը ցույց տվեց, որ COVID-19-ի դեմ պատվաստվելու ցանկություն ունեն հարցվածների 45 տոկոսը: Հարցման մասնակիցների 11 տոկոսը հայտնել է, որ արդեն պատվաստում ստացել է։
Հետազոտության մասնակիցների ավելի քան մեկ երրորդը (34 տոկոս) խոստովանել է, որ սահմանափակող միջոցների կիրառումն իրենց կյանքի վրա ավելի բացասաբար է ազդել, քան համավարակը: Խիստ լոքդաունի դեմ ավելի հաճախ բողոքում են 25-ից 34 տարեկան հարցվողները (44 տոկոսը՝ միջինը 34 տոկոսի դիմաց):
