ԵՐԵՎԱՆ, 24 մարտի – Sputnik. ՀՀ պաշտպանության նախկին փոխնախարար Արտակ Զաքարյանը Facebook-ում արձագանքել է ՀՀ վարչապետ Նիկոլ Փաշինյանի` ՍՈւ30ՍՄ ինքնաթիռների մասին հայտարարությանը:
«Էս մարդն առանց ստելու չի կարողանում ապրի։ Այսօր խորհրդարանում Նիկոլը կրկին ստեց` ասելով, որ ՍՈւ30ՍՄ ինքնաթիռները Հայաստան են եկել 2020թ. մայիսին։ Համացանցի բոլոր պաշտոնական և ոչ պաշտոնական լրատվամիջոցները տեսանյութերով ապացուցում են, որ ՍՈւ30ՍՄ-ները Հայաստան են եկել 2019թ. դեկտեմբերի վերջին»,- գրում է Զաքարյանը։
Նախկին փոխնախարարը նաև շեշտում է, որ այս հաշվարկով մինչ պատերազմը Փաշինյանը ուղիղ ինն ամիս ժամանակ ուներ հրթիռներ ձեռք բերելու և Հայաստան տեղափոխելու համար։ Բայց չի արել։
«Իսկ նա ստելով փորձում է արդարանալ, որ իբր ժամանակը կարճ էր, դրա համար հրթիռներ չեն գնել։ Իսկ այդ ո՞վ է որոշել, որ հրթիռները կարելի է ձեռք բերել ինքնաթիռները բերելուց հետո, հատկապես, որ դրանց ձեռք բերման աղբյուրները տարբեր են։ Սովորաբար որևէ տիպի սպառազինություն ձեռք բերողը միաժամանակ լուծում է նաև անհրաժեշտ զինամթերքի գնման հարցը»,- նշում է նախկին պաշտոնյան:
Հիշեցնենք` Փաշինյանն այսօր ԱԺ-ում հայտարարել էր, որ ՍՈւ-30-ների մասին իր նախկին հայտարարություններն իրար չեն հակասում, և որ վարժական թռիչքի ժամանակ ինքնաթիռներից հրթիռներ արձակվել են, բայց դրանք եղել են ՀՀ բանակի նախկինում ունեցած սպառազինությունների հաշվեկշռում:
Մարտի 20-ին Արագածոտնի մարզի Օհանավան համայնքի բնակիչների հետ հանդիպման ժամանակ ՀՀ վարչապետ Նիկոլ Փաշինյանը հայտարարել էր. «Այո՛, մենք ինքնաթիռ ենք գնել, որոնք մայիսին են բերվել և այո, չենք հասցրել հրթիռները մինչև պատերազմը ձեռք բերել։ Բա ինքնաթիռները դուք ձեռք բերեիք, որ մենք էլ հասցնեինք հրթիռները ձեռք բերել։ 26 տարվա պետությունը ինչու չուներ կործանիչ ավիացիա»:
Իսկ 2020թ. հուլիսի 3-ին վարչապետ Նիկոլ Փաշինյանը Facebook–ի իր էջում գրել էր. «Մեր Սու-30ՍՄ-ները երեկ «մարտական խոցումով» առաջին վարժական թռիչքներն են իրականացրել` փորձարկելով երկինք-երկիր հրթիռներ՝ «գրոհային գործողության» համար։ Բոլոր թիրախները խոցվել են բարձր ճշգրտությամբ»։
ՀՀ ՊՆ ռազմական վերահսկողության ծառայության նախկին պետ Մովսես Հակոբյանն էլ հայտարարել էր, որ Ռուսաստանից ձեռք բերված Սու-30ՍՄ կործանիչները առանց զինամթերքի են եղել, քանի որ Ռուսաստանը 130 կմ հեռահարությամբ «օդ-օդ» հրթիռներ չի վաճառում այլ երկրի, ինչի պատճառով էլ մեր ՍՈւ–երը չեն օգտագործվել պատերազմի ժամանակ: Հայաստանի իշխանություններն այդ հայտարարությունը չէին հաստատել։
