Արծվիկ Մինասյանը հիշեցրեց, որ նշված պողոտան ընդդիմադիրները փակել են այն ժամանակ, երբ ԶՈւ Գլխավոր շտաբը ցուցաբերեց վճռականություն, և սպայական բարձրագույն կազմի ավելի քան քառասուն ներկայացուցիչներ տվեցին վարչապետի, կառավարության գործունեության գնահատականն ու պահանջեցին նրանց հրաժարականը։
«Բնականաբար անհրաժեշտ էր, որ այդ ժամանակահատվածում երևար ժողովրդի ու բանակի միասնությունը, առհասարակ ԶՈւ վճռական դերակատարությունն այդ գործընթացում։ Բայց մենք ականատես եղանք, թե ինչպես Գլխավոր շտաբի սպայակազմի նկատմամբ տեղի ունեցան ապօրինություններ և արձանագրվեց ղեկավար կազմի նահանջ»,– նշեց ՀՅԴ Գերագույն մարմնի անդամը։
Մինասյանի կարծիքով` իրենք մի կողմից հասան նրան, որ ի վերջո Փաշինյանը, ով մեկ ամիս առաջ «իմքայլականների» հետ հայտարարում էր, թե հասարակական ընդվզման պահանջ չկա, արդեն համոզվեց հակառակում, իսկ մյուս կողմից Դեմիրճյան փողոցի փակումն, ըստ Մինասյանի, տեղի ունեցավ այն ժամանակ, երբ պետք է ապօրինաբար դադարեցվեին Օնիկ Գասպարյանի` ԳՇ պետի պարտականությունները, հետևաբար այդ հարցում նույնպես նպատակը ցույց տալն էր, որ դժգոհ ժողովուրդը պահանջ է առաջադրել և այն պետք է կյանքի կոչվի։
«Ակնկալվում էր, որ Զինված ուժերը կգտնվեին բարձրության վրա և առանց «ռազմական հեղաշրջում» արտահայտությունը կյանքի կոչելու` վճռականորեն կկանգնեին պետականության կողքին, բայց նման բան չարեցին։ Նրանք ընտրեցին իրավական ճանապարհը, մինչդեռ անհրաժեշտ էր իրավունքի ուժին համապատասխան ուժի գործադրումը դարձնել երկրում անվտանգության երաշխավորման վարքագիծ»,– նշեց ՀՅԴ Գերագույն մարմնի անդամը։
Արտակ Դավթյանն իրավունքի ուժով համարվում է ԶՈւ գլխավոր շտաբի պետ. Փաշինյան
Մինասյանի համոզմամբ` կընտրվի այն լավագույն լուծումը, որը մի կողմից չի խանգարի քաղաքացիների ազատ տեղաշարժին, բայց մյուս կողմից հանրային պահանջը կմնա և կունենա դրսևորումներ այլ միջոցառումների տեսքով։ Մինասյանի տեղեկացմամբ` պողոտան բացելու վերաբերյալ քննարկումներն ընթացքի մեջ են և մոտ ապագայում այդ առթիվ կլինի հստակ պատասխան։
