ԵՐԵՎԱՆ, 20 մարտի - Sputnik. Մեր ժողովուրդների բարիդրացիական հարաբերությունները մշտապես ամուր հիմք են հանդիսացել Հայաստանի և Իրանի միջև փոխգործակցության շարունակական զարգացման համար: Այս մասին ասվում է Հայաստանի Հանրապետության նախագահ Արմեն Սարգսյանի շնորհավորական ուղերձում, որն իրանական Ամանորի` Նովրուզի առթիվ նա հղել է Իրանի Իսլամական Հանրապետության նախագահ Հասան Ռոհանիին: Տեղեկությունը հայտնում է ՀՀ նախագահի մամուլի ծառայությունը։
«Տարածաշրջանում ստեղծված բարդ իրավիճակը պարտադրում է աշխատել երկկողմ քաղաքական և տնտեսական հարաբերությունների օրակարգն ընդլայնելու ուղղությամբ: Համոզված եմ, որ գիտակցելով առկա մարտահրավերները, առավել մեծ ջանքեր կներդնենք ընթացիկ ծրագրերը շուտափույթ իրագործելու և նոր պայմանավորվածություններ ձեռք բերելու համար»,–ընդգծել է նախագահ Սարգսյանը:
Նշենք, որ նույն տոնի առթիվ ՀՀ նախագահը շնորհավորական ուղերձ է հղել նաև Իսլամական հեղափոխության գերագույն առաջնորդ Սեյյեդ Ալի Խամենեիին, մաղթել, որ գալիք տարին Իրանի ժողովրդի համար լինի քաղաքական և տնտեսական հաջողությունների տարի:
Արմեն Սարգսյանը շեշտել է, որ Հայաստանի և Իրանի միջև տարբեր բնագավառներում փոխգործակցության համար կարևոր է կառուցողական երկխոսության շարունակականությունը, որը հիմնված է միմյանց կրոնի և մշակույթի հանդեպ հարգանքի վրա:
Արմեն Սարգսյանը շնորհավորական ուղերձ է հղել Սերբիայի նախագահին
