ԵՐԵՎԱՆ, 20 մարտի - Sputnik. Արցախյան պատերազմից հետո ստեղծված իրավիճակն ու մարդասիրական խնդիրներն այսօր քննարկել են ՀՀ նախագահ Արմեն Սարգսյանը և Ամենայն հայոց կաթողիկոս Գարեգին Բ-ն։ Նախագահի պաշտոնական կայքից տեղեկանում ենք, որ Արմեն Սարգսյանն այցելել է Մայր աթոռ սուրբ Էջմիածին և հանդիպել կաթողիկոսի հետ։
«Հանրապետության նախագահը և Վեհափառ Հայրապետն անդրադարձել են մասնավորապես Ադրբեջանում պահվող հայ ռազմագերիների և քաղաքացիական անձանց վերադարձի, անհայտ կորածների և զոհվածների աճյունների հայտնաբերման ուղղությամբ ձեռնարկվող աշխատանքներին»,–նշված է հաղորդագրության մեջ։
Բացի այդ, քննարկվել են նաև Արցախի հոգևոր-մշակութային ժառանգության պահպանմանն վերաբերող խնդիրներ։ Կողմերն իրենց մտահոգությունն են հայտնել Ադրբեջանի վերահսկողության տակ գտնվող տարածքներում պատմական հուշարձանների և սրբավայրերի նկատմամբ դրսևորվող բարբարոսական վերաբերմունքի առնչությամբ։
ԼՂ–ում հրադադարի հաստատման եռակողմ համաձայնագիրը չստորագրելը մեծ աղետ կլիներ. Փաշինյան
Նախագահը և վեհափառ հայրապետն անդրադարձել են երկրում ստեղծված իրավիճակին, ներքաղաքական ճգնաժամը հաղթահարելու ուղիներին, ինչպես նաև խոսել ազգային կարևորագույն խնդիրների ու մարտահրավերների մասին։
Հիշեցնենք, որ այսօր Արագածոտնի մարզի Ուջան համայնքի բնակիչների հետ հանդիպման ժամանակ վարչապետ Նիկոլ Փաշինյանը հայտնել է, որ պատերազմի հետևանքով ունենք հաստատված 3250 զոհ, մեծ թվով անհետ կորածներ։ Բացի այդ, 189 ծնող էլ ԴՆԹ են արել և սպասում են պատասխանի։
