Ռուս խաղաղապահներն Արցախում ապահովում են ջրատար կայանի կառուցման անվտանգությունը՝ Խնապատ ու Ասկերան բնակավայրերը ջրով ապահովելու համար։ Մարտական գործողությունների հետևանքով դրանց մեծ մասն առանց ջրամատակարարման է մնացել: Տեղեկությունը հայտնում է ՌԴ ՊՆ մամուլի ծառայությունը։
Նշվում է, որ ավելի վաղ պոմպակայանի շինարարական աշխատանքները դադարեցվել էին կողմերի սահմանազատման գծի անմիջական մոտակայքում գտնվելու պատճառով:
Շինարարական աշխատանքների վերսկսումը հնարավոր է դարձել հայկական ու ադրբեջանական կողմերի միջև ձեռք բերված պայմանավորվածությունների արդյունքում։ Բանակցություններին աջակցել է ռուսական խաղաղապահ զորախմբի հրամանատարությունը։
Ներկայում խմելու ջուրը Խնապատ ու Ասկերան է մատակարարվում կոմունալ ծառայությունների ուժերով, սակայն պոմպակայանը շահագործման հանձնվելուց հետո դրա հզորությունը բավարար կլինի ոչ միայն նշված բնակավայրերի, այլև հարակից գյուղատնտեսական տարածքների բնակիչներին խմելու ջրով ապահովելու համար:
«Մարտական գործողությունների հետևանքով տուժած շրջաններում ռուս խաղաղապահների աջակցությամբ շարունակվում է կենսական կարևորություն ունեցող ինժեներական հաղորդակցությունների վերականգնումը», - նշված է հաղորդագրության մեջ:
Հիշեցնենք` 2020թ.–ի նոյեմբերի 9-ին ՌԴ նախագահ Վլադիմիր Պուտինը, ՀՀ վարչապետ Նիկոլ Փաշինյանը և Ադրբեջանի նախագահ Իլհամ Ալիևը համատեղ հայտարարություն են ընդունել ռազմական գործողությունների դադարեցման վերաբերյալ։
Եռակողմ հայտարարության համաձայն` Լեռնային Ղարաբաղի շփման գծի և Լաչինի միջանցքի երկայնքով տեղակայվել է Ռուսաստանի Դաշնության խաղաղապահ զորակազմը ՝ 1960 զինծառայողներով, հրաձգային զենքով, 90 զրահամեքենաներով, 380 միավոր ավտոմոբիլային և հատուկ տեխնիկայով:
Ռուսաստանի Դաշնության խաղաղապահ զորակազմը տեղակայվել է 5 տարի ժամկետով, որից հետո այդ ժամանակահատվածը մեխանիկորեն կերկարաձգվի ևս 5 տարով, եթե կողմերից որևէ մեկը ժամկետի ավարտից 6 ամիս առաջ չհայտարարի տվյալ դրույթի կիրառումը դադարեցնելու մտադրության մասին:
Ղարաբաղում խաղաղապահ գործողության գինն ու վարկանիշը. թվերն ավելի քան խոսուն են
