Դիտարկելով մասնավորապես այն առաջարկությունը, ըստ որի` արդարադատության նախարարից, դատավորների ընդհանուր ժողովի էթիկայի և կարգապահական հարցերի հանձնաժողովից բացի, ԲԴԽ–ին կարող են դիմել ֆիզիկական և իրավաբանական անձինք` իրենց մասնակցությամբ կոնկրետ գործերով, Արա Ղազարյանն ընդգծեց, որ առաջարկն ընդհանուր առմամբ բացասական չէ, պարզապես ԲԴԽ–ն պետք է ավելորդ օղակ ստեղծի իր մոտ, որպեսզի ֆիլտրվեն քաղաքացիների դիմում–բողոքները, քանզի, ըստ նրա, պարզ է, որ շատ կլինեն անհիմն կամ արկածախնդիր դիմումներ։
«Քաղաքացիները մի քիչ դժվար են պատկերացնում կարգապահական վարույթի առարկան, դրա նպատակները, հիմնականում քաղաքացիները գրում են վրդովմունքից ելնելով, երբ պարտվում են դատարանում և ուզում են, որ դատավորը պատժվի, բայց դատավորների կարգապահական պատասխանատվության նպատակը պատիժը չէ, այլ վարքագծի կարգավորումը»,– նշեց փաստաբանը։
Ղազարյանի գնահատմամբ` լավ կլիներ, որ գործող համակարգը մնար, պարզապես փաստաբանի համար պարզ չէ, թե ինչ խնդիր են տեսել երկու խողովակների` արդարադատության նախարարության և էթիկայի հարցերով հանձնաժողովի միջև, բայց եթե ԲԴԽ–ն ցանկանում է իր առանձին խողովակն ունենալ, ապա դա ավելորդ ծանրաբեռնվածություն է կառույցի համար։
Անդրադառնալով այն դրույթին, ըստ որի` ԲԴԽ–ն նորմատիվ իրավական ակտեր կարող է ընդունել դատարանների նկատմամբ` Ղազարյանը հիշեցրեց, որ դեռևս 2015 թվականին կատարել էր հետազոտություն Արդարադատության խորհրդի մասին և առաջարկել, որ Հայաստանը վերցնի ԲԴԽ–ների հյուսիսային մոդելը, այլ ոչ թե հարավայինը, որովհետև վերջինս կառույցի լիազորությունները սահմանափակում էր միայն կարգապահական վարույթների և դատավորներ նշանակելու պարագայում, սակայն այդ մարմինները բավարար ակտիվություն չունեին դատական իշխանության մեջ։
«Ես առաջարկում էի հյուսիսային մոդելը, որտեղ ԲԴԽ–ի նման մարմինները քաղաքականություն մշակող, ինքնուրույն բյուջետային և դատական համակարգի կառավարման լիազորություններ ունեին։ Այն ժամանակ քննադատեցին` ասելով, որ շատ հավակնոտ է, բայց հետո պարզվեց, որ 2016 թվականից սկսած` գնացին հենց այդ ճանապարհով, այսինքն` ԲԴԽ–ն ավելի մեծ լիազորություններ, ավելի լայն գործառույթներ է ստանում` դառնալով պրոակտիվ կառույց, դատական համակարգում քաղաքականություն ձևավորող մարմին, իսկ դրա համար անհրաժեշտ է, որ ընդունի նաև նորմատիվ իրավական ակտեր, և ունենա ընդհուպ մինչև ինքնուրույն կերպով օրենսդրական նախաձեռնությամբ հանդես գալու լիազորություն»,– նշեց փաստաբանը։
Արման Բաբաջանյանի հարցով հանձնաժողով կստեղծվի. ԲԴԽ նախագահը դիմել է ԱԺ նախագահին
Անդրադառնալով վերոհիշյալ նախագծի այլ դրութներին, դրանց դրական ու բացասական կողմերին` Ղազարյանն ընդգծեց, որ առաջարկություններն ընդհանուր առմամբ արդյունավետ, էական փոփոխություններ չեն բերի գոյություն ունեցող իրական խնդիրների լուծման առումով։
