ԵՐԵՎԱՆ, 18 մարտի — Sputnik. Ռուսաստանի ԱԳՆ պաշտոնական ներկայացուցիչ Մարիա Զախարովան մեկնաբանել է ԱՄՆ նախագահ Ջո Բայդենի՝ Ռուսաստանի մասին հնչեղ հայտարարությունները` ընդգծելով, որ Վաշինգտոնն ինքը պետք է պարզաբանի «ռուս-ամերիկյան հարաբերություններում տեղի ունեցող իրադարձությունները»:
Ավելի վաղ Բայդենը ABC հեռուստաալիքին տված հարցազրույցում ասել էր, որ Վլադիմիր Պուտինը «պատասխան կտա ընտրություններին միջամտելու համար»: ԶԼՄ-ները նաև պնդում են, որ Բայդենը Ռուսաստանի նախագահին «մարդասպան» է անվանել, սակայն պարզ չէ, արդյո՞ք Բայդենը դա իրականում նկատի ուներ, թե ոչ: Սպիտակ տան մամուլի քարտուղար Ջեն Պսակին հրաժարվել է պարզաբանել՝ արդյո՞ք Բայդենի խոսքերը Պուտինի մասին փոխաբերական էին ասված, թե ոչ։
«Մենք գիտենք, որ մեր ամերիկացի գործընկերներն հրաժարվել են պատասխանել, թե ինչ է իրականում տեղի ունեցել այնտեղ։ Նրանք պարզապես պատասխաններ չունեն։ Պետք է նրանց հարցնել, թե ինչ է իրենց մոտ կատարվում», — ասել է Զախարովան «Վեստի FM» ռադիոկայանի եթերում։
Ավելի վաղ ԱԳՆ-ն հայտնել էր, որ ԱՄՆ-ում Ռուսաստանի դեսպան Անատոլի Անտոնովին հրավիրել են Մոսկվա՝ Վաշինգտոնի հետ հարաբերությունների ներկա համատեքստը գնահատելու համար: Գերատեսչությունում ընդգծել են, որ ցանկանում են խուսափել «Վաշինգտոնի հետ հարաբերությունների անշրջելի դեգրադացիայից»:
ԱՄՆ առևտրի նախարարությունն ընդլայնել է Ռուսաստանի դեմ արտահանման սահմանափակումները։ Ռուսաստանը ներառվել է այնպիսի երկրների ցանկում, որոնց հետ ամբողջությամբ արգելված է զենքի արտահանումն ու ներմուծումը: ԱՄՆ-ի առևտրային պատժամիջոցները կանդրադառնան անվտանգության հետ կապված արտահանման վրա. ավիացիայի և տիեզերքի հետ կապված մի շարք բացառություններ կգործեն միայն մինչև սեպտեմբերի 1-ը: Որոշումն ուժի մեջ կմտնի մարտի 18-ից։ Նման միջոցառումների առիթ է դարձել Ալեքսեյ Նավալնու հետ կապված իրավիճակն ու «քիմիական և կենսաբանական զենքի կիրառումը»:
Թուրքիայում անհանգիստ են. ԱՄՆ-ի հետ հարաբերությունները չեն կարգավորվում
Բացի այդ, երեկ ԱՄՆ-ի ազգային հետախուզության գրասենյակը գաղտնազերծել է մի զեկույց, որում Մոսկվային մեղադրել են Դոնալդ Թրամփի վերընտրությանը օգնելու, Ջո Բայդենին վարկաբեկելու և ամերիկյան հասարակությունում «թշնամություն սերմանելու» փորձերի մեջ: Փաստաթղթում նշվում է Ռուսաստանի դեմ նոր պատժամիջոցներ սահմանելու մասին։
Կրեմլում զեկույցն անվանել են «անհիմն ու անապացույց»: ՌԴ նախագահի մամուլի քարտուղար Դմիտրի Պեսկովն ընդգծել է, որ Ռուսաստանը ոչ մի կապ չի ունեցել ընտրություններում թեկնածուների դեմ որևէ արշավների հետ: Նրա խոսքով ՝ նման դատարկ նյութերը օգտագործվում են որպես նոր պատժամիջոցների առիթ։
