ԵՐԵՎԱՆ, 16 մարտի – Sputnik. «Ազատագրում» շարժման մասնակիցներն անհնազանդության ակցիա են իրականացրել Երևանի Սայաթ-Նովա փողոցում։
Շարժման ղեկավարը Tert.am–ի հետ զրույցում ասաց, որ «Ազատագրումը» որևէ կուսակցական ուղղվածություն չունի, այն ազգային–ազատագրական շարժում է։
«Մենք չենք կարող ապրել մի երկրում, որտեղ վարչապետը դավաճան է, նա մեր հողերը ծախել ու ծախում է։ Մեր նպատակն է, որ նա հրաժարական տա, և նոր ընտրություններ լինեն»,–ասաց ակցիայի կազմակերպիչ երիտասարդը։
Մոտ 3 տարի առաջ իշխանափոխությունից հետո Հայաստան տեղափոխված տղան ասում է, որ Փաշինյանին ինքը քննադատել է դեռ մինչև պատերազմը։
«Նա միշտ է ասել, որ Արցախը Հայաստանի համար բեռ է։ Փաշինյանը միշտ էր պատրաստ այս քայլին գնալ ու դա արեց ոչ թե միայն թուղթ ստորագրելով, այլ մեր տղաների արյունը թափելով։ Ինքը որևէ սրբություն չունեցող մարդ է»,–ասաց նա։
Սայաթ-Նովա– Աբովյան խաչմերուկի երթևեկելի հատվածը ակցիայի մասնակիցները փակել էին աղբամաններով։ Մասնակիցների գլխակների և շապիկների վրա գրված է «Ազատագրում»։
Կարճ ժամանակ անց նրանց մոտեցած ոստիկանական ուժերը հորդորեցին բացել ճանապարհը։
