ԵՐԵՎԱՆ, 15 մարտի – Sputnik. Հայաստանի ազգային պոլիտեխնիկական համալսարանի ռեկտոր է ընտրվել Գոռ Վարդանյանը: Տեղեկությունը Facebook–ի իր էջում հայտնել է համալսարանի ուսանողական խորհրդի նախագահ Գևորգ Հարությունյանը:
«Շնորհավորում եմ բոլոր պոլիտեխնիկցիներին, մենք կունենանք մեր երազանքների Պոլիտեխնիկը»,- գրել է Հարությունյանը:
Նշենք, որ սա ռեկտորի ընտրության երկրորդ փուլն էր։
Հիշեցնենք՝ մարտի 1-ին ՀԱՊՀ-ում չէր հաջողվել նոր ռեկտոր ընտրել։ Թեկնածուներից որևէ մեկին չէր հաջողվել 50+1 տոկոս ձայներ հավաքել։ Առաջադրվել էր վեց թեկնածու, նրանցից երկուսը՝ Արամ Միքայելյանը և Պարգև Բալջյանը, հանել էին իրենց թեկնածությունը։
Թեկնածուներից Նորայր Հարությունյանը կողմ ձայներ չէր ստացել, Դավիթ Ղազարյանի օգտին քվեարկել էր մեկ մարդ, Ամալյա Մխիթարյանը ստացել էր 13, իսկ Գոռ Վարդանյանը՝ 16 կողմ ձայն:
Այդպիսով՝ նշանակվել էր ռեկտորի ընտրության երկրորդ փուլ, որտեղ էլ ընտրվել է Գոռ Վարդանյանը:
