ԵՐԵՎԱՆ, 15 մարտի – Sputnik. Այսօր մարտի 15-ին Հայաստանի Հանրապետություն կժամանի ԵԱՀԿ գործող նախագահ, Շվեդիայի արտգործնախարար Անն Լինդեն: Տեղեկությունը հայտնում է ՀՀ արտգործնախարարության մամուլի ծառայությունը։
«Մարտի 16-ին ՀՀ ԱԳՆ-ում կկայանա Հայաստանի ԱԳ նախարարի և ԵԱՀԿ գործող նախագահի, Շվեդիայի ԱԳ նախարարի հանդիպումը»,– նշված է հաղորդագրության մեջ։
Արա Այվազյանի և Անն Լինդեի հանդիպումը տեղի կունենա մարտի 16-ին ժ. 10։30-ին, որին 11:35-ին կհետևի ՀՀ ԱԳ նախարարի և ԵԱՀԿ գործող նախագահի հայտարարությունը ԶԼՄ ներկայացուցիչների համար:
Հիշեցնենք՝ մարտի 10-ին ԵԱՀԿ գործող նախագահը Twitter-ի իր էջում գրառում էր կատարելով՝ տեղեկացնելով, որ առաջիկայում կայցելի Հայաստան և Ադրբեջան: Շվեդիայի արտգործնախարարը ԵԱՀԿ-ում նախագահությունը ստանձնել է 2020-ի տարեվերջին։
Լինդեն, սակայն, այս տարվա փետրվարին այցելել էր տարածաշրջան. նա եղել էր Վրաստանում, որից հետո այցելել էր Մոլդովա։
ԵԱՀԿ գործող նախագահի կարգավիճակում նա դեռ չի եղել Հայաստանում և Ադրբեջանում։
Ավելի վաղ ՌԴ արտաքին գործերի նախարար Սերգեյ Լավրովը փետրվարի 2-ին Մոսկվայում հանդիպել էր Անն Լինդեի հետ: Հանդիպմանը քննարկվել էր նաև Լեռնային Ղարաբաղի հակամարտության կարգավորման հարցը։
Ավելի վաղ հայտնել էինք, որ Լինդեն մարտի 15-ին մեկնելու է Ադրբեջան։
