ԵՐԵՎԱՆ, 12 մարտի - Sputnik. Մինչ ԳՇ պետի պաշտոնից հեռանալը Օնիկ Գասպարյանը բազում հանդիպումներ ու հեռախոսազրույցներ է ունեցել քաղաքական-հասարակական տարբեր գործիչների հետ` վստահեցնելով, որ չի հեռանալու և հասնելու է Նիկոլ Փաշինյանի հրաժարականին։ Տեղեկությունը հայտնում է «Հրապարակը»։
Օնիկ Գասպարյանն ասել է, որ ԳՇ իրավաբանների հաշվարկով` առնվազն 3-4 ամիս կարող էր, օրենսդրությունն իր օգտին մեկնաբանելով, մնալ շտաբում։
«Գասպարյանը հանդիպումներից մեկի ժամանակ վստահեցրել է, թե իրեն հաջողվել է Փաշինյանին համոզել գնալ արտահերթ ընտրությունների, բայց թե որ ֆորմատով՝ իր վարչապետությա՞մբ, թե՞ առանց իրեն, չի ասել»,–գրված է թերթում։
Գասպարյանի անսպասելի նահանջը նրա հետ շփված անձանց մոտ կասկածներ է առաջացրել, որ Փաշինյանը նրան հրաժարականի հստակ խոստում է տվել, այդ պատճառով էլ նա հրաժարվել է իրավիճակը սրելուց և վերջին ուղերձը հրապարակել։ Պարզապես շատերը տարակուսում են՝ մի՞թե Գասպարյանն այնքան միամիտ է, որ հավատում է Փաշինյանի խոստումներին։
Հիշեցնենք, որ մարտի 10-ին` պաշտոնից ազատվելուց մեկ օր անց, Գասպարյանը հայտարարեց, որ դիմել է վարչական դատարան։ Նա վստահեցրել էր նաև, որ իր ծառայությունը հայրենիքին և հայ ժողովրդին շարունակելու է այլ կարգավիճակով։ Իսկ թե մասնավորապես ինչի մասին է խոսքը, հայտնի չէ։
