ԵՐԵՎԱՆ, 12 մարտի - Sputnik. ՀՀ նախագահ Արմեն Սարգսյանը «Աստղիկ» բուժկենտրոն է այցելել հետազոտություններ անցնելու համար։ Sputnik Արմենիայի հետ զրույցում հայտնեց նախագահի օգնական Հասմիկ Պետրոսյանը։
Նշենք, որ քիչ առաջ «Հրապարակը» գրել էր, որ նախագահին ստենդավորում են «Աստղիկ» ԲԿ–ում։
«Արմեն Սարգսյանը կորոնավիրուսով էր վարակվել։ Հիվանդությունը բարդ ընթացք ուներ, որի հետևանքով էլ բարդություններ են առաջացել։ Այժմ նախագահն «Աստղիկ» ԲԿ–ում է, հետազոտություններ է անցնում»,–ասաց Պետրոսյանը։
Ինչ վերաբերում է ստենդավորման լուրերին, Պետրոսյանի խոսքով` նման խնդիր չկա։
Հիշեցնենք՝ հունվարի 5-ին հայտնի դարձավ, որ Լոնդոնում գտնվող Սարգսյանի մոտ կորոնավիրուս է հաստատվել, որն ընթանում է բարդություններով ու հիվանդությանը հատուկ ախտանշաններով։
Նախագահը մեկուսացել էր ու բուժում էր ստանում տանը` բժիշկների հսկողության տակ, միևնույն ժամանակ հեռավար աշխատելով։ Հունվարի 13-ին հայտնի դարձավ, որ նա տեղափոխվել է հիվանդանոց։
Կորոնավիրուսով վարակվել էր նաև նախագահի կինը՝ Նունե Սարգսյանը։
Սարգսյանը Երևան վերադարձավ փետրվարին։
