ԵՐԵՎԱՆ, 12 մարտի - Sputnik. «Բարգավաճ Հայաստան» կուսակցության օրակարգը չի փոխվել՝ պահանջում են վարչապետ Նիկոլ Փաշինյանի հրաժարականը, Ծառուկյան-Փաշինյան սպասվող հանդիպումը չի նշանակում, թե կոալիցիա են կազմելու։ Լրատվամիջոցների հետ հարցազրույցում այս մասին հայտարարեց կուսակցության առաջնորդ Գագիկ Ծառուկյանը։
Նրա խոսքով՝ հանդիպումն ու քննարկումն անհրաժեշտ են ստեղծված իրավիճակն օր առաջ հանգուցալուծելու համար։
«Եթե թշնամին թշնամի է՝ էլի գնում հանդիպում են։ Եթե չհանդիպենք, չքննարկենք, ավելի կվատանա վիճակը։ Ես չեմ ասում՝ կոալիցիա եմ Փաշինյանի հետ կազմելու, ասելու եմ՝ հրաժարական տուր, քանի որ թույլ մարդու հետ հաշվի չեն նստում, մենք օր օրի մեր ստեղծածը կորցնելու ենք»,- նշեց Ծառուկյանը։
Ծառուկյանը պնդում է, որ ամեն մեկի խելքի բանը չէ մեր երկիրն այս վիճակից հանելը։
Վարչապետի և ընդդիմադիր ուժերի հանդիպումը նախագահականում չի կայանա
Հիշեցնենք` այսօր հայտնի դարձավ, որ Փաշինյան-Ծառուկյան երկկողմ հանդիպումը կկայանա։ Ծառուկյանն ընդգծել էր՝ ստեղծված իրավիճակից դուրս գալու համար անհրաժեշտ է քայլ կատարել։
Ինչ վերաբերում է ՀՀ նախագահի նստավայրում ՀՀ վարչապետի ու ընդդիմադիր ուժերի հանդիպմանը, ապա այն, ինչպես հաղորդեցին նախագահի մամուլի ծառայությունից, չեղարկվում է։
