ԵՐԵՎԱՆ, 11 մարտի - Sputnik. Տոմատի հյութը կարգավորում է արյան ճնշումը, սրտանոթային հիվանդությունների զարգացման վտանգ ունեցող մարդկանց մոտ իջեցնում խոլեստերինի մակարդակը։ ՌԻԱ Նովոստիի փոխանցմամբ՝ նման եզրահանգման են եկել Տոկիոյի բժշկական համալսարանի ճապոնացի գիտնականները։
Մեկ տարվա փորձարկման ընթացքում 481 կամավոր օգտագործել են ոչ աղի տոմատի հյութ, ընդ որում` անսահմանափակ քանակի։ Նրանցից յուրաքանչյուրն օրագիր էր վարում, որտեղ նշում էր առողջական վիճակի ցանկացած փոփոխություն։
Բոլոր կամավորների ցուցանիշները համեմատելով՝ ճապոնացի մասնագետներն եկել են այն եզրակացության, որ նախահիպերտոնիայով կամ հիպերտոնիայով տառապող մասնակիցների մեծ մասի մոտ արյան ճնշումն ընկել է միջինը 3 տոկոսով։
Միևնույն ժամանակ գիտնականները նշել են, որ տոմատի հյութը անհրաժեշտ է օգտագործել առանց հավելումների. քանի որ այն մեծ քանակությամբ նատրիում է պարունակում, ուստի կարող է հակառակ ազդեցություն ունենալ։
