ԵՐԵՎԱՆ, 10 մարտի - Sputnik. Մշակութային գործիչները, որոնք անտարբեր նստած են այս օրերին, ամբողջությամբ չեն գիտակցում այն վտանգը, որը սպառնում է Հայաստանին։ Բաղրամյան պողոտայում Հայրենիքի փրկության շարժման հանրահավաքից առաջ լրագրողների հետ զրույցում նման կարծիք հայտնեց դիրիժոր Հարություն Արզումանյանը։
«Այնպես չէ, որ խնդիրը լուծվել–վերջացել է, և Թուրքիան ու Ադրբեջանն էլ հիմա մեզ հետ ընկերական հարաբերություններ են ուզում հիմնել։ Նրանց նպատակը մեզ կուլ տալն է, և պրիմիտիվ մտածողության արդյունք է այն կարծիքը, թե Արցախի մի մասը հանձնելով` բարեկեցիկ կապրենք այսուհետ։ Իհարկե տեսնում եմ, որ այս ամենը գիտակցողների քանակը օրեցօր ավելանում է»,–ասաց Արզումանյանը։
Նրա խոսքով` մտավորականներին այժմ ֆեյքերի միջոցով փորձում են սևացնել։
Ռեժիսոր, մուլտիպլիկատոր Դավիթ Սահակյանցը նույնպես կարծում է, որ իրական վտանգը տեսնելու խնդիր կա այժմ, և մարդիկ լուրջ չեն ընկալում այն վտանգները, որոնք կան այսօր։ Բացի այդ, ըստ Սահակյանցի, չկա հավատ այն ուժերի հանդեպ, որոնք այսօր ընդդիմության դեմ են դուրս եկել։
«Ստեղծված իրավիճակում մեկ ելք կա` բանակն ու ժողովուրդը պետք է միանան իրար` ելնելով իշխանության այս պրոյեկտի դեմ»,–ասաց Սահակյանցը։
Նկարիչ Արմեն Աթանյանն էլ իր հերթին նշեց, որ այսօրվա իշխանությունները «քոքից» կտրել են մշակութային արժեքները։ նա կոչ արեց մտավորականներին միանալ այս շարժմանը և ամենևին էլ կապ չունի` 17 կուսակցություն, թե 20 կուսակցություն է այժմ ոտքի կանգնել։
«Կարևորն արտահերթ խորհրդարանական ընտրությունների հասնելն է։ Պետք է ոտքի կանգնել։ Իհարկե, եղածը քանդելուց հետո մտավորականներին միավորելը շատ բարդ կլինի, սակայն պետք է միավորվել»,–ասաց Աթանյանը։
Նշենք, որ քիչ անց Բաղրամյան պողոտայում կմեկնարկի ընդդիմության հանրահավաքը։
Հիշեցնենք` Հայաստանի ներքաղաքական իրավիճակը սրվեց, երբ ՀՀ ԶՈւ գլխավոր շտաբը փետրվարի 25-ին պահանջեց ՀՀ վարչապետ Նիկոլ Փաշինյանի հրաժարականը` նշելով, որ քաղաքական ղեկավարությունը պետությունը տանում է դեպի վտանգավոր սահմանագիծ։ Դա տեղի ունեցավ այն բանից հետո, երբ վարչապետը պաշտոնից հեռացրեց ԳՇ պետի առաջին տեղակալ Տիրան Խաչատրյանին։
Ի պատասխան Նիկոլ Փաշինյանը հայտարարեց ռազմական հեղաշրջման փորձի մասին և քաղաքացիներին կոչ արեց հավաքվել Հանրապետության հրապարակում` հեղափոխությունը պաշտպանելու համար։
Նա հայտնեց նաև, ստորագրել է ԳՇ շտաբի պետ Օնիկ Գասպարյանին պաշտոնից հեռացնելու փաստաթուղթը, որը, սակայն, ՀՀ նախագահ Արմեն Սարգսյանը չստորագրեց և հետ ուղարկեց փետրվարի 27–ին։ Նույն օրը վարչապետը առաջարկությունը նորից ուղարկեց ՀՀ նախագահին։
Գլխավոր շտաբը մարտի 1-ին նոր հայտարարություն տարածեց` նշելով, որ կրկին հաստատում է ստեղծված իրավիճակի վերաբերյալ իր գնահատականները և շեշտում, որ, անկախ Զինված ուժերը քաղաքական գործընթացների մեջ ներքաշելու փորձերից, մնում Է անդրդվելի, կշռադատված և հաստատակամ։
Մարտի 2-ին հայտնի դարձավ, որ նախագահը չի ստորագրել Օնիկ Գասպարյանին ԳՇ պետի պաշտոնից ազատելու հրամանագիրը, բայց ՍԴ է դիմելու ոչ թե Նիկոլ Փաշինյանի ներկայացրած հրամանագրի նախագծի սահմանադրականության հարցը պարզելու համար, այլ «Զինվորական ծառայության և զինծառայողի կարգավիճակի մասին» 2017թ. նոյեմբերի 15-ի ՀՀ օրենքի՝ Սահմանադրությանը համապատասխանելու հարցը որոշելու խնդրանքով:
Այսօր կառավարությունը հրապարակեց ՀՀ վարչապետ Նիկոլ Փաշինյանի հայտարարությունը` նշելով, որ 2021թ. մարտի 10-ից Օնիկ Գասպարյանն իրավունքի ուժով համարվում է ազատված զբաղեցրած պաշտոնից։
Մինչ այդ ՀՀ նախագահի աշխատակազմը հայտնեց, որ Արմեն Սարգսյանը դիմում է ներկայացրել Սահմանադրական դատարան «Զինվորական ծառայության և զինծառայողի կարգավիճակի մասին» 2017թ. նոյեմբերի 15-ի օրենքի՝ Սահմանադրությանը համապատասխանելու հարցը որոշելու խնդրանքով:
