ԵՐԵՎԱՆ, 9 մարտի - Sputnik. Զինծառայողների ապահովագրության հիմնադրամը ներկայացրել է 2021թ.-ի մարտի 9 դրությամբ հիմնադրամի շահառուների թվի վերաբերյալ հաշվետվությունը։
««Կամուրջ» ծրագրով հատուցվել են 1133 շահառուներ, նրանցից 118-ը վիրավորում ստացած զինծառայողներ են, որոնց բժշկական հաստատությունը տրամադրել է եզրակացություն առ այն, որ բուժման ավարտից հետո 1-ին կամ 2-րդ հաշմանդամության կարգ ստանալու հավանականությունը մեծ է։ 1015-ը անհետ կորած զինծառայողների ընտանիքներ են»,–նշված է հաղորդագրության մեջ։
Հիմնադրամի հիմնական շահառուների թիվը նույնպես փոփոխվել է. սեպտեմբերի 27-ին սանձազերծած պատերազմի արդյունքում զոհված ևս 121 զինծառայողների ընտանիքներ հատուցում են ստացել։ Այսպիսով ընդհանուր հատուցումների թիվը 1862 է, որից 1450-ը` այս պատերազմի արդյունքում:
«Վերադարձրեք հայրիկիս». անհետ կորածների ծնողները բողոքի ակցիայի են բերել երեխաներին
Հավելենք, որ «Զինծառայողների ապահովագրության» հիմնադրամը ստեղծվել է հայրենիքի սահմանները պաշտպանելիս զոհված, անհետ կորած, հաշմանդամություն ձեռք բերած մարտիկների ու նրանց ընտանիքների սոցիալական բարօրության, կայուն և հավասար ապահովագրական հատուցումներ տրամադրելու նպատակով:
Նշենք, որ պատերազմի հետևանքով անհայտ կորած և գերեվարված զինծառայողների ընտանիքներին կտրամադրվի ամսական 300.000 դրամ աջակցություն՝ առավելագույնը 6 ամիս ժամկետով։
Զոհված զինծառայողների ընտանիքները հիմնադրամից միանվագ ստացել են 10 միլիոն դրամ, իսկ ամսական կստանան 200-300 հազար դրամ փոխհատուցում: Մարտական հերթապահություն իրականացնելու ընթացքում զոհված շարքային զինծառայողների ընտանիքները ամսական կստանան 200 հազար, պայմանագրային զինծառայողների ընտանիքները՝ 250 հազար, իսկ սպաների ընտանիքները՝ 300 հազար դրամ:
Ադրբեջանը հայտնել է պատերազմում զոհվածների և անհետ կորածների պաշտոնական թիվը
