ԵՐԵՎԱՆ, 9 մարտի - Sputnik. Տավուշի մարզի մի շարք գյուղերի ուղղությամբ հայ-ադրբեջանական սահման գծելու մասին լուրերը հայկական մամուլում և սոցցանցերում մեծ աղմուկ բարձրացրին։ Ամեն ինչ ընթացավ Սյունիքում փորձարկված ու արդեն դասական դարձած սցենարով։ Սկզբում ընդդիմությունը հայտարարեց հողերը հանձնելու մասին, հետո իշխանությունը հերքեց, բայց արդյունքում պարզվեց, որ սահմանների ճշգրտման որոշակի գործընթաց ամեն դեպքում լինելու է։
Ավելի վաղ սոցցանցերում ու տարբեր ԶԼՄ-ներում տեղեկություն տարածվեց, որ Տավուշի մարզի մի քանի գյուղերի տարածքում արդեն երկու օր է` սահմանի երկայնքով շուրջ 500 խաղաղապահ ու ադրբեջանցի չափագրումներ են անում։ Իսկ ՀՀ նախկին վարչապետ Հրանտ Բագրատյանը Facebook-ի իր էջում գրեց. «Ադրբեջանցի «խաղաղապահ» զինվորները չափագրումներ են կատարում Տավուշի մարզի Ազատամուտ համայնքում, նախկին Բարխուդարլիի (Ադրբեջանական ԽՍՀ նախկին էքսկլավ) մերձակայքում, և արդեն մոտեցել են մեր հայրենակիցներին և շատ «քաղաքավարի» ասել` ձեր գոմերն ու տները կտանեք գետից այն կողմ»։ Մարզային իշխանությունն ու ՊՆ-ն ավելի ուշ կտրականապես հերքեցին այդ տեղեկությունները, սակայն գործընթացն, ինչպես ասում են, արդեն սկսվել էր։
Sputnik Արմենիայի թղթակիցը որոշեց տեղում պարզել իրավիճակը։ Ազատամուտի գյուղապետ Արթուր Բեգինյանը մեզ հետ զրույցում վստահեցրեց, որ ոչ մի խաղաղապահ և ադրբեջանական ուժեր գյուղում չկան և չեն եղել, հողերի հանձնման մասին խոսակցություններն էլ իրականությանը չեն համապատասխանում։
«Մենք էս տարածքում ենք, և դուք էլ կարող եք փաստել, օբյեկտիվն էլ կարող է ֆիքսել, որ տարածքում խաղաղապահներ, ադրբեջանական ուժեր չկան, և նման խոսակցությունները չեն համապատասխանում իրականությանը։ Նման հարցով որևէ անգամ որևէ հանդիպում չի եղել, տարածքների հետ կապված որևէ զրույց չի եղել, իրականությունն այն է, որ մենք էս պահի դրությամբ գտնվում ենք այն տարածքներում, որոնց մասին էս վերջին օրերին խոսվում է, բայց մենք ի ուրախություն բոլորիս փաստում ենք, որ չի կարա նման բան լինի, քանի որ մենք այստեղ ենք գտնվում։ Բայց եթե նման բան լիներ, մենք հաստատ գոնե 5 րոպե այստեղ չէինք կարող կանգնած լինել։ Տեղի բնակչությունը մտահոգվելու լուրջ պատճառ չունի, մարդիկ իրենց առօրյա կյանքով, իրենց առօրյա խնդիրներով, իրենց կենցաղային խնդիրներով, իրենց բնականոն կյանքով ապրում են։ Եթե նման բան չկա, մարդիկ ուղղակի նման լուրերին վերաբերվում են որպես ապատեղեկատվություն, ստահոդ լուրեր», - հավելեց գյուղապետը։
Մեր թղթակիցը համոզվեց, որ Ազատամուտ գյուղի մոտ ո՛չ ադրբեջանցիներ կան, ո՛չ էլ խաղաղապահներ, ինչը, սակայն, չի բացառում ռուս զինծառայողների հավանական ներկայությունը։ Պետք չէ ռազմական փորձագետ լինել հասկանալու համար, որ Արցախում ռուս խաղաղապահներն ու Գյումրիում 102–րդ ռազմակայանը բոլորովին տարբեր զորամիավորումներ են։
Տավուշում կան ռուս զինծառայողներ, սակայն նրանց կարելի է հանդիպել նաև Երևանում։ Եթե ռուսական կողմն աջակցում է հայկական բանակի ուժեղացմանը, ամրապնդմանը, անհասկանալի է` ինչու ռուսական համազգեստով մարդիկ չպետք է գտնվեն այս կամ այն մարզում, այդ թվում՝ Տավուշում։
Սակայն տեղի բնակիչների հետ զրույցները մեր թղթակցին համոզեցին, որ ադրբեջանական նախկին էքսկլավների հետագա ճակատագրի վերաբերյալ քննարկումներ, այնուամենայնիվ, տարվում են։
Զուգահեռաբար ակտիվ խոսակցություններ են պտտվում, թե տարածքների հավանական զիջումներին մասնակցում են ռուս զինվորականները։ Sputnik Արմենիան փորձեց պարզել, թե ով է ասել ռուսների մասնակցության մասին։ Գրեթե բոլոր բնակիչները պատասխանեցին` այդ մասին Facebook-ում են կարդացել։
Ստացվում է, որ որոշ շրջանակներ դիտավորյալ փորձում են պատասխանատվությունը գցել ռուսական կողմի վրա` միաժամանակ ստուգելով, թե ինչպես կարձագանքի հանրությունը տարածքային հավանական զիջումների լուրերին։
