ԵՐԵՎԱՆ, 8 մարտի - Sputnik. Արարատի մարզի Գեղանիստ գյուղում ծաղկավաճառ Կարինե Թովմասյանին շատերն են ճանաչում. նա 13 տարի է, ինչ ընտանեկան բիզնես է հիմնել ու ծաղիկների վաճառքով է զբաղվում։
33-ամյա Կարինեն պատմում է, որ ամեն ինչ սկսվել է ծաղիկների հանդեպ մեծ սիրուց, որի միջոցով էլ հաղթահարել է բոլոր դժվարությունները։
«Ծաղիկների վաճառքով զբաղվելու համար պետք է սեփական ջերմոց ունենայի։ Երբ ընտանիքիս ասացի, որ ուզում եմ ջերմոց հիմնել, հայրս դեմ էր, քանի որ կարծում էր` ծաղիկները շուտ են փչանում, «տակ կտամ»։ Բայց ես արդեն որոշել էի ու գործի անցա։ Առաջին իսկ տարին ճիշտ է` քիչ, բայց շահույթ ունեցա»,–պատմում է Կարինեն։
Ծաղկի գործը թվում է, թե շատ հեշտ է, սակայն իրականում բավականին նրբություններ ու համբերատարություն է պահանջում. Կարինեն ասում է` երկար ճանապարհ ես անցնում` մինչև սածիլը դարձնում ես ծաղիկ։ Ճիշտ վայր է պետք ընտրել սածիլների համար, հետո անհրաժեշտ է ջերմոցը լավ ջեռուցել, որպեսզի դրանք «կպչեն»։
Դրան պետք է հաջորդի ծաղիկներն էտելը, հետո քաղն ու նոր միայն փունջ պատրաստելը։ Այս ամենը Կարինեն ինքն է անում, դրա համար էլ ձեռքերը հաճախ են վնասվում, սակայն հաճախորդները տեսնում են միայն խանութում դրված գեղեցիկ փնջերը։
Նրա խանութում, որն, ի դեպ, անուն չունի, կարելի է գտնել ոչ միայն ծաղիկներ, այլև տնային բույսեր։ Կարինեն ասում է` վերջին տարիներին տնային բուսեր գնելու մշակույթ է ձևավորվել։ Պահանջարկ ունեն հատկապես արդեն ծաղկածները։
Իսկ առհասարակ` հայերս ամենաշատը վարդ ենք գնում։ Մուգ կարմիր։ Կարինեն ինքն էլ վարդ է սիրում ու վաճառում է «կիսահայաֆիկացված» հոլանդական վարդեր։ Դրանց տարբերությունն այն է, որ գլուխներն ավելի փոքր և նուրբ են լինում` մեր եղանակային պայմաններից ելնելով։
Իսկ թե ինչու են հատկապես վարդ գնում` Կարինեն կարծում է, որ գաղտնիք չէ` վարդը ծաղիկների թագուհին է և առանձնանում է մյուսներից։
Սակայն վարդից բացի, շատ են գնում նաև սեզոնային ծաղիկներ, հատկապես կակաչներ։ Կարինեն հիշում է` մեկ դեպք էլ եղել է, որ նշանադրության համար մեծ փունջ մեխակներ են գնել` ասելով, որ աղջիկը հենց մեխակ է սիրում։
«Ճիշտ է, տոնական օրերին ավելի շատ են ծաղիկ գնում, սակայն մեզ մոտ անառիթ էլ ծաղիկ նվիրելու սովորություն կա։ Ես հաճախորդ ունեմ, որ ամեն շաբաթ իր կնոջ համար ծաղիկներ է գնում։ Ճիշտ է, կանայք էլ են իրար ծաղիկներ նվիրում, բայց, միևնույն է, ամենաշատը հենց տղամարդիկ են ծաղիկ գնում»,–ասում է Կարինեն ու հավելում` կանայք դաժան են ծաղիկ գնելիս, քանի որ շատ են «գին գցում»։
Տղամարդիկ, հատկապես այս` տոնական օրերին, բավական առատաձեռն են` երբեմն մանրն էլ չեն վերցնում։
Կարինեն Մարտի 8-ի տոնին 2 օր առաջ է պատրաստվում` փնջեր կապելով։ Փնջերի դիզայնն ինքն է ընտրում, սակայն այս տարի ավելի շատ մանուշակագույնի մեջ է պատրաստում` «դա է մոդա»։ Միշտ չէ, որ պատրաստած բոլոր փնջերը գնում են հենց մարտի 8-ին, սակայն Կարինեն սիրում է, որ խանութը լիքն է լինում` մարդիկ ընտրելու հնարավորություն են ունենում։
Իսկ մարտի 8-ին հաճախորդների մեծ մասը հենց տղամարդիկ են լինում, որոնք հիմնականում վարդեր են գնում։ Կարինեն ասում է` այդ օրը որոշակի թանկացում լինում է, սակայն ոչ այնքան, որ մարդիկ չկարողանան ծաղիկ գնել։ Բացի դրանից, յուրաքանչյուրին անհատական մոտեցում է ցուցաբերում. զինվորների ծնողներին, օրինակ, միշտ զեղչեր է անում, ծնողներն էլ Կարինեին հաճախ են քաղցրավենիք նվիրում։
«Մա՛յր իմ, արևս կուզեի քեզ տալ». հայ զինվորների շնորհավորանքները մարտի 8–ի առթիվ
Չնայած Կարինեն ծաղիկներ շատ է սիրում, սակայն ծաղիկ երբեք նվեր չի ստանում, քանի որ բոլորը նույնն են կարծում` ծաղկի գործի մեջ է Կարինեն, ծաղիկն ի՞նչ է անում։
«Մի անգամ փողոցում ինձ մանուշակներ նվիրեցին` փոքր փունջ էր։ Այնքան էի ուրախացել` աշխարհն իմն էր։ Ճիշտ է, ծաղիկ նվեր չեմ ստանում, սակայն նաև շատ եմ ուրախանում, երբ տեսնում եմ մարդկանց երջանկությունը ծաղիկ գնելիս»,–ասում է նա։
Կարինեն, ի դեպ, խորհուրդ է տալիս չմոռանալ խնամել ծաղիկները` դրանց ջուրն օրական երկու անգամ փոխելով։
