ԵՐԵՎԱՆ, 8 մարտի – Sputnik. ՀՀ ԱԳ նախարարությունը մարտի 8-ի առիթով ուղերձ է հղել, որտեղ շնորհավորել է հայ կանանց ու հիշեցրել որ աշխարհում առաջին կին դեսպանը հայուհի է եղել:
«Մեր ամենաջերմ շնորհավորանքները, սիրելի կանայք. Դուք համարձակ եք, խելացի և ուժեղ: Հայկական դիվանագիտությունը հպարտ է հատկապես այն հանգամանքով, որ առաջին կին դեսպանը Դիանա Աբգարն է եղել։ Շնորհավոր կանանց միջազգային օրը»,- ասված է ուղերձում։
Նշենք, որ Դիանա Աբգարի գործունեության շնորհիվ էր, որ 1918 թվականին Ճապոնիան առաջիններից մեկը ճանաչեց Հայաստանի առաջին Հանրապետության անկախությունը։ 1920 թվականի հուլիսին` Սևրի պայմանագրի ստորագրման նախաշեմին, ՀՀ վարչապետ և արտգործնախարար Համազասպ Օհանջանյանը Դիանա Աբգարին դիվանագիտական ներկայացուցիչ և Հայաստանի գլխավոր հյուպատոս նշանակեց Հեռավոր Արևելքում, իսկ Ճապոնիայում` Հայաստանի արտակարգ և լիազոր դեսպան։
Նա Հայոց ցեղասպանության մասին 9 գրքերի հեղինակ է։
Դիանա Աբգարը մահացել է 1937 թվականի հուլիսի 8-ին, Յոկոհամայում։ Նրա աճյունն ամփոփվել է տեղի օտարերկրացիների գերեզմանատանն՝ ամուսնու շիրմի կողքին։ Տվյալ պահին Աբգարի շիրիմը գտնվում է Հայ-ճապոնական հասարակության հովանավորության տակ Տոկիոյում։ Դիանա Աբգարի գերեզմանի, ինչպես և հարևանությամբ գտնվող ամուսնու գերեզմանի կողքին սպիտակ քարից խաչ է դրված։
